Россияликлар коронавирусга қарши вакцина билан бир йил ичида тўлиқ таъминланиши мумкин

Гамалея номидаги Эпидемиология ва микробиология маркази раҳбари Александр Гринцбург коронавирусга қарши вакцинанинг россияликлар учун етарли миқдори бир йил ичида ишлаб чиқарилишига умид қилмоқда. Ушбу марказ вакцинаси дунёда биринчи бўлиб рўйхатдан ўтказилганди.

«Мамлакат эҳтиёжларини озми-кўпми қоплай олишга қачон улгуришимизни билиш муҳим, бу 9-12 ой ичида бўлишига умид қиляпман», — деган у «ТАСС» нашрига ва дастлаб 10-15 та ҳудудлар вакцина билан таъминланишини билдирган (айнан қайси ҳудудлар эканига аниқлик киритмаган).

Гамалея номидаги марказ раҳбарининг таъкидлашича, учта корхона ишлаб чиқаришни вакцина яратиш бўйича улар технологиясига мослаштира олди. Яқин бир ярим ой ичида улар ойига тахминан миллионта доза вакцина ишлаб чиқаришни бошлаши керак. «Йил охирига бориб эса у 1,5-2 миллионтага етиши мумкин. Бу мамлакат миқёсида жуда яхши кўрсаткич», — дейди Гринцбург.

Эслатиб ўтамиз, вакцина 11 август куни рўйхатдан ўтказилганди. Унга «Спутник V» деб номланган. Вакцина 2021 йилнинг январидан муомалага чиқарилиши маълум қилинган. Россия президенти Владимир Путин вакцина самарали эканлигини таъкидлаб қизларидан бири ушбу вакцина билан эмланганини билдирган.

Мамлакат соғлиқни сақлаш вазири Михаил Мурашко вакцина биринчи навбатда ўқитувчилар ва шифокорларга таклиф этилишини маълум қилган.

Россиянинг «П-Фарм» компанияси директорлар кенгаши раҳбари Алексей Репик ушбу вакцина экспорт қилинганда икки дозаси камида 10 доллардан сотилишини айтган.  ЖССТ россиялик олимлар ва мамлакат расмийлари билан алоқада бўлиб турибди ва вакцина синовлари тўғрисидаги маълумотни таҳлил қилиш имкониятини кутмоқда.