Навоий вилояти ҳудудида жойлашган ҳамда Бухоро—Навоий вилоятларини бир-бирига туташтириб турувчи йирик Тўдакўл сув ҳавзаси қирғоғида замонавий дам олиш маскани очилди. Бу ҳақда «Дарё» мухбири Лайло Ҳайитова хабар берди.
Туризмни ривожлантириш давлат қўмитаси, Бухоро ва Навоий вилоятлари ҳокимликлари ҳамкорлигида ўтказилган Silk Road Family Resort дам олиш масканининг очилиш маросимида қўмита раиси ўринбосари Улуғбек Агзамов қатнашди.
Бухоро ҳокими ўринбосари Ботир Шаҳриёровнинг маълумот беришича, дам олиш маскани Президентнинг 2020 йил 19 июндаги қарорига кўра қурилган бўлиб, туризм ва унга ёндош инфратузилмани ривожлантириш назарда тутилган.
«Тўдакўл соҳили бўйида барпо этилаётган пляж, дам олиш ва соғломлаштириш маскани ҳамда аквапаркнинг умумий қиймати 6 миллион долларни ташкил этади. Тўдакўл қирғоғига туташ бўлган 15 гектар майдонда мазкур объектнинг биринчи босқичида 500 нафар, иккинчи босқичида эса 1500 нафардан ортиқ сайёҳни қабул қилиш имконияти яратилади. Бу сайёҳлик дам олиш маскани ишга тушгач, 150 дан ортиқ янги иш ўринлари яратилиши кўзда тутилган», — дейди Ботир Шаҳриёров.
Таъкидланишича, соҳилбўйи дам олиш масканининг қурилиш жараёни 2022 йилда тўлиқ якунланади. Маскан тўлиқ қувватда фаолият юрита бошласа, дастлабки даврда 4,5 миллиард сўм, кейинчалик эса 40 миллиард сўмгача даромад олиши кутилмоқда.
Маҳаллий аҳолига кўра, аслида узоқ йиллар эътибордан четда, фақатгина қишлоқ хўжалиги ерларини суғоришга мўлжалланган сув ҳавзаси қирғоқларида бундай бунёдкорлик ишларининг бажарилиши уларни қувонтиради.
«Сув омбори уч минг гектар бўлиб, соҳилнинг ички ўрта чуқурлиги 4-5 метрга етади. Тўдакўл суви қишлоқ хўжалигига мослаштирилган сув бўлиб, у Амударёдан тўлдирилади. Амударё сувини ушлаб турган мазкур сув омбори орқали пахтазорларни суғориш ишлари бажарилаётгани боис сув ҳажми анча камайган», — дейди Bukhara Brilliant Silk компанияси раҳбари, лойиҳа таъсисчиси Бахтиёр Жўраев.
Бахтиёр Жўраевга кўра, Тўдакўл суви тоза бўлиб, ундан ичимлик суви сифатида ҳам фойдаланиш мумкин.
«Айни пайтда аквапарк, кичик Disneyland, 50 ўринга мўлжалланган меҳмонхона, кема кўринишидаги ресторан, ёзги терасса, СПА салон, табиат қўйнидаги ўйингоҳ, от спорти майдони, автотураргоҳ қурилишлари давом этмоқда», — дейди Бахтиёр Жўраев.
Изоҳ (0)