Карантин қоидаларига риоя қилинмаслик оқибатида коронавирус фарзандга юқса, бола ҳам касалликни оғир даражада кечириши мумкин. Бу ҳақда 17 август, душанба куни АОКАда бўлиб ўтган брифингда Коронавирусга карши кураш штаби аъзоси, профессор Севара Убайдуллаева айтиб ўтди.
Брифингда Севара Убайдуллаева ота-оналар имкон қадар фарзандларини ўзи билан бирга ишга олиб бормаслигини тавсия этди.
«Касаллик тез тарқалаётган бугунги кунда биз ва фарзандларимиз учун энг хавфсиз ҳудуд — бу ўз хонадонларимиздир. Агарда уйингизда ёши катталар бўлса, уларга болани қолдириб, ишга чиққанингз маъқул. Ишда одамлар билан кўп мулоқотда бўлсангиз, ўзингиз ҳам карантин ва шахсий гигиена қоидаларига доимий риоя қилишингиз талаб этилади. Болалар касалликни енгилроқ кечириши мумкинлиги айтилмоқда. Лекин карантин қоидаларига риоя қилмаслик оқибатида фарзандингизга вирус кўп миқдорда юқса, бола ҳам касалликни оғир даражада кечириши мумкин», — деди мутахассис.
Республика махсус комиссиясининг қарорига кўра, 15 августдан бошлаб Ўзбекистонда нодавлат мактабгача таълим ташкилотлари ва мактаблар, шунингдек, ўқув курслари ва марказлари фаолиятини қайта йўлга қўйишга рухсат берилган. Давлат мактабгача таълим ташкилотларининг қачондан иш бошлашига ойдинлик киритилмаган.
Халқ таълими вазирлиги мактаблар қачон очилиши ҳақида якуний қарорни махсус комиссия томонидан чиқарилиши ва комиссия қарори яқин орада чиқишини маълум қилган эди.
Изоҳ (0)