Қозоғистон биринчи президенти Нурсултон Назарбоевнинг невараси Ойсултон Назарбоев 16 августга ўтар кечаси Лондонда 29 ёшида вафот этган. Бу ҳақда Zakon.kz хабар бермоқда.
Ўлим сабаби аниқлаштирилмоқда. Дастлабки тахминларга кўра, унинг юраги тўхташи оқибатида ўлим юз берган.
Ойсултон Назарбоев Дариға Назарбоева ва Раҳат Алиевнинг ўғли эди. У 1990 йил 26 августда туғилган. Унинг отаси Раҳат Алиев 2015 йилда Венадаги қамоқхонада ўлик ҳолда топилганди.
Ойсултон Британиянинг Қироллик ҳарбий академиясини ва Қозоғистондаги КИМЕП университетининг магистратура босқичини тамомлаган. У Қозоғистон Мудофаа вазирлигининг бош разведка бошқармасида хизмат қилган. Футбол билан шуғулланган ҳамда Қозоғистон ва хорижнинг бир неча клубида, жумладан, «Порцмут»нинг ёшлар жамоасида ўйнаган. Қозоғистон футбол федерациясида вице-президент лавозимида ишлаган.
2019 йилда Ойсултон Лондонда ўз жонига қасд қилишга уринганида уни тўхтатиб қолган полиция ходимини тишлаб олганди. Бу ҳаракати учун суд унга 1,5 йил муддатга шартли жазо берганди.
Ойсултон Назарбоев 2020 йил февралида ижтимоий тармоқдаги саҳифаси орқали Буюк Британиядан сиёсий бошпана беришни сўраган ҳамда Россия ва Қозоғистон ҳукуматлари ўртасидаги йирик кўламли коррупция ва халқдан ўғирланган миллиардлаб долларлар ҳақидаги маълумотга эга экани ҳақида ёзганди.
Изоҳ (0)