Беларуснинг Словакиядаги элчиси биринчи бўлиб мамлакатдаги норозилик намойишларини қўллаб-қувватлади
Беларуснинг Словакиядаги элчиси Игорь Лешеня мамлакатда содир бўлаётган тинчлик намойишлари иштирокчиларини қўллаб-қувватлади. Элчининг бу борадаги видеомурожаати Telegram’даги «Наша Нива» каналида эълон қилинган.
Лешеня норозилик намойишларини қўллаб-қувватлаган амалдаги беларус элчиларидан биринчиси ҳисобланади. У Беларусда қўлга олинганларни қийноққа солиш ва калтаклаш борасидаги хабарлардан шокда эканлигини маълум қилган.
«Афсуски, бунинг учун зарур шарт-шароитлар мавжуд эди. 15 йил олдин бизда ‘Сталин чизиғи’ очиқ эди. Ва гап нафақат совет халқининг қаҳрамонликлари ҳақида кетмоқда. Эътиборга молик жиҳати — унда Сталин номининг учраши. Шундан сўнг, ички ишлар вазири пайдо бўлди, ундаги Сталин НКВДсининг формаси 1937 йилги қирғинлар ва ГУЛАГ ҳақида эмас, Ғалаба куни ҳақида эслатиб турарди. Бугун юзлаб ҳамюртларим ҳуқуқ-тартибот органларининг қатор вакиллари бағрикенг Беларусда, XXI асрда НКВД анъаналарини тўлиқ қайта тикланганини ҳис қилди», — дейди элчи.
Лешенянинг қўшимча қилишича, «бирдам, кучли ва ташқи таъсирларга учрамайдиган давлат таркибини ўз халқи хоҳиши, унинг тили, тарихи ва маданиятига ҳурмат каби қарашлар ташкил этади».
«Словакияда мен Конституцияга кўра мамлакатимизга ягона ҳукумат манбаси ҳисобланувчи Беларусь давлати ва халқининг вакилиман. Ўз овозларининг ҳисобга олинишини истаб кўчада тинчлик намойишини ўтказаётган беларус халқи билан ҳамфикрман», — дейди элчи.
Игорь Лешеня 2016 йилдан буён Беларуснинг Словакиядаги элчиси ҳисобланади. Бунга қадар у Миср ва Исроилда элчи бўлган. 2002—2006 йилларда Лешеня Беларусь президентининг ёрдамчиси лавозимида фаолият юритган.
Аввалроқ Беларусь президенти стипендияси лауреатлари оммавий равишда мукофотлардан воз кечгани тўғрисида хабар берилганди.
Мавзуга доир:
