Шимолий Кореяга янги бош вазир тайинланди

Шимолий Корея бош вазири ўзгарди, деб хабар бермоқда «ТАСС». Янги бош вазир этиб КХДРда ҳукмрон Меҳнат партиясидан бўлган Ким Дон Хун тайинланган.

Шимолий Корея марказий телеграф агентлиги (КМТА) маълумотларига кўра, ҳукуматни бошқарган Ким Чже Рён партиянинг Марказий қўмитаси раҳбариятидан янги лавозим олди.

Қайд этилишича, ҳукумат раҳбарини алмаштириш ҳақида Марказий қўмита сиёсий бюроси йиғилишида қарор қабул қилинган. Йиғилиш Шимолий Корея етакчиси Ким Чен Ин раислигида ўтказилган.

Эслатиб ўтамиз, июнь ойининг бошларида Шимолий ва Жанубий Корея муносабатлари ёмонлашганди. 14 июнь куни Жанубий Корея ҳукумати Шимолий Корея билан боғлиқ ҳар қандай вазият юзасидан жавоб беришга тайёрлигини таъкидлаб, КХДРни икки мамлакат ўртасидаги ҳарбий битим бўйича келишувларни амалга оширишга чақирди. 16 июнь куни эса Шимолий Корея ҳарбийлари Кэсон шаҳрида жойлашган Кореялараро алоқа офисини портлатиб юборди.

Шунингдек, КХДР ва АҚШ ўртасидаги муносабатлар ҳам кескинлигича қолмоқда. Улар ўртасидаги музокаралар тўхтаб қолган.

Аввалроқ АҚШ президенти Дональд Трамп КХДРга нисбатан санкцияларни яна бир йилга узайтирган, Ким Чен Ин эса Жанубий Кореяга қарши ҳарбий ҳаракатлар режасини тўхтатиб туришга қарор қилган эди.