Ўзбекистон, АҚШ ва Афғонистон COVID-19 оқибатларини бартараф этиш, терроризм ва наркотрафикка қарши курашишда ҳамкорликни кенгайтиради. Бу ҳақда ТИВ матбуот хизмати хабар берди.
12 август куни Ўзбекистон—АҚШ—Афғонистон уч томонлама ҳамкорлик шакли Хавфсизлик бўйича қуйи қўмитасининг видеоконференция шаклида бўлиб ўтган биринчи йиғилишида шундай қарорга келинган.
Томонлар, хусусан, коронавирус инфекциясининг минтақавий ва глобал хавфсизликка таъсирини муҳокама қилган. COVID-19 оқибатларини бартараф этиш учун кучларни бирлаштириш зарурлиги қайд этилган.
Бундан ташқари, аёллар ва қизларнинг ҳуқуқ ва манфаатларини таъминлаш соҳасидаги алоқаларни мустаҳкамлаш, уларга нисбатан куч ишлатиш ва хотин-қизларнинг сифатли таълим олиши борасидаги муаммоларни ҳал қилиш механизмлари муҳокама қилинган.
Май ойи охирларида Ўзбекистон—АҚШ—Афғонистон биринчи уч томонлама мажлиси видеоконференцалоқа шаклида бўлиб ўтганди. Унда COVID-19 пандемияси афғон халқига инсонпарварлик ёрдамини бериш, аввало, дори-дармон ва озиқ-овқат маҳсулотлари билан таъминлаш бўйича халқаро ҳамкорликни кенгайтириш зарурлиги таъкидланганди.
Изоҳ (0)