Ижтимоий тармоқларда Яккасарой тумани, Салар кўчаси, “Дилбулоқ” маҳалласида жойлашган кўп қаватли уйлар ҳудудида ер чўкиши юзага келгани ҳақида хабар тарқалди. Ҳолат юзасидан Тошкент шаҳар Қурилиш ва уй-жой коммунал хўжалиги соҳасида назорат қилиш инспекцияси маълумот берди.
Унга кўра, мазкур ҳудуддаги қурилиш ишлари “Люкс лойиҳа” МЧЖ томонидан ишлаб чиқилган лойиҳа ҳужжатлари асосида амалга оширилмоқда. Лойиҳа учун “Архитектура ва шаҳарсозлик кенгаши” ишчи органи ҳамда “Шаҳарсозлик ҳужжатлари экспертизаси” ДУКнинг ижобий хулосалари олинган.
Қурилиш объектининг А-блоки Тошкент шаҳар Қурилиш ва уй-жой коммунал хўжалиги соҳасида ҳудудий назорат қилиш инспекциясидан белгиланган тартибда рўйхатдан ўтган.
Шу кунга қадар инспекция томонидан объектда 10 марта мониторинг ўтказилиб, 11 та ёзма кўрсатма берилган. Шунингдек, қурилиш меъёр ва қоидаларига риоя қилинмагани сабабли буюртмачи икки маротаба маъмурий жавобгарликка тортилган.
Қайд этилишича, лойиҳанинг G4-блоки бўйича вазият бошқача. Ушбу блок “Архитектура ва шаҳарсозлик кенгаши”дан ижобий хулоса олган бўлса-да, “Шаҳарсозлик ҳужжатлари экспертизаси” ДУКдан хулоса олинмаган. Шу боис мазкур блок инспекцияда рўйхатдан ўтмаган ва қурилиш ишлари ноқонуний бошлангани аниқланди. Ҳолат юзасидан инспекция томонидан тегишли тартибда ҳуқуқни муҳофаза қилувчи органларга маълумот берилган.
Шунингдек, ўрганиш жараёнида буюртмачи “Ўзкоммаишийсавдо” МЧЖ томонидан G4-блок учун котлован қазиш ишлари олиб борилаётганда ҳудуддаги электр трансформаторида носозлик юзага келгани аниқланган. Шу сабабли котловандаги сизот сувларини чиқариш имкони бўлмаган, натижада сув даражаси кўтарилиб кетган.
Бунинг оқибатда эса қўшни “Grand Capital” МЧЖ томонидан илгари қурилган ерости автомашина турар жойининг қайта кўмилган жойларида тупроқ силжиши юз бериб, сирпанишга сабаб бўлган.
Ҳозирда инспекция томонидан мазкур ҳолат бўйича қўшимча ўрганиш ишлари олиб борилмоқда.
Изоҳ (0)