Халқаро савдо-иқтисодий ҳамкорлик маркази (XСИҲМ) «Жибек жоли—Ғишткўприк» назорат-ўтказиш пункти ҳудудида ҳар икки давлат чегараси яқинида жойлашади. Бу ҳақда Қозоғистоннинг LS ахборот агентлиги маълум қилди.
Халқаро савдо-иқтисодий ҳамкорлик бир нечта босқичда яратилади:
- Биринчи босқич — тайёргарлик. Унга кўра, марказни қуриш учун ажратилган ер участкаларини ўрганиш, ягона техник-иқтисодий асосни (ТИА) ишлаб чиқиш, қўшнилар билан мувофиқлаштириш ва тегишли меъёрий ҳужжатларни қабул қилиш таъминланади;
- Иккинчи босқич — лойиҳалаштириш ва қуриш.
«Инфратузилишга аниқ эҳтиёж, шунингдек, молиялаштириш ҳажми, манбалари ва механизмлари XСИҲМ қуришнинг техник-иқтисодий асосини ишлаб чиқишни томонлар мустақил белгилайди. Ҳозирда Қозоғистон томонидан биринчи навбатда марказ бўйича инвесторни аниқлаш ишлари ўтказилмоқда», — дейилади Қозоғистон Савдо ва интеграция вазирлиги хабарида.
Идоранинг қўшимча қилишича, марказни ишга тушириш муддати тайёргарлик босқичи якунлангач маълум бўлади.
Эслатиб ўтамиз, Ўзбекистон ва Қозоғистон чегарасида халқаро савдо марказини яратиш тўғрисида 2019 йилда хабар берилганди. Лойиҳа муаллифларининг фикрича, у Қозоғистон ва Хитой чегарасидаги «Хоргос» халқаро чегараолди ҳамкорлик марказининг муқобилига айланиши керак.
Марказ ҳудудида товарлар (юклар) ва транспорт воситалари эркин, виза расмийлаштирувларисиз ҳаракатланиши мумкин.
Изоҳ (0)