Наманган вилояти Мингбулоқ туманида аҳолидан ичимлик суви учун йиғилган пулларни талон-торож қилган собиқ мансабдор шахслар қўлга олинди. Бу ҳақда Бош прокуратура «Дарё»га хабар қилди.
Маълум қилинишича, Бош прокуратура ҳузуридаги Департаментнинг Мингбулоқ туман бўлими томонидан терговга қадар текширув ўтказилган. Натижада тумандаги «Тоза ичимлик сув» УК собиқ мансабдор шахслари томонидан етказилган тоза ичимлик суви учун аҳолидан йиғиб олинган 190 миллион сўм нақд пул маблағларини тегишли банк кассасига топширмасдан талон-торож қилганликлари аниқланган.
Мазкур ҳолат юзасидан корхона раҳбарининг собиқ биринчи ўринбосари М.Б.га нисбатан Жиноят кодексининг 167-моддаси 3-қисми «а» банди (жуда кўп миқдорда ўзлаштириш ёки растрата йўли билан талон-торож қилиш) билан жиноят иши қўзғатилиб, тергов ҳаракатлари ўтказилмоқда.
Аввал Наманганда боғчани таъмирлаш жараёнида 173,2 миллион сўм бюджет маблағини талон-торож қилганларга жиноят иши очилгани, Сурхондарёда Халқ таълими бўлими ҳисобчиси ўқитувчиларнинг 355,3 миллион сўмлик маблағларини ўзлаштиргани, Андижонда уй-жой коммунал хизмат кўрсатиш бошқармаси мансабдорлари ишламаган ходимларга пул ёзиб, 239 миллион сўм ўзлаштиргани ва Чилонзорда маҳалла раиси ва бандлик инспектори ишсизларга ажратилган 36 миллион сўмни талон-торож қилгани ҳақида хабар берилган эди.
Изоҳ (0)