Тошкент шаҳар Сергели туманида икки эркак жанжаллашаётгани аниқланган. Шаҳар ИИББ маълум қилишича, улар ота ва ўғил бўлган.
Маълум қилинишича, 2020 йил 11 август куни соат 22:30 да Тошкент шаҳар ИИББга Сергели тумани Спутник-4 массивида иккита эркак жанжаллашаётгани ва бири иккинчисини ураётгани ҳақида хабар келиб тушган. Воқеа жойига ППХ автоэкипажи етиб борган. Эркакларни ажратиб, Сергели тумани ИИО ФМБ 2-сонли ички ишлар бўлимига етказилган.
Суҳбат давомида маълум бўлишича, 27 ёшли Сирожиддин Э. бир неча кун давомида уйига келмаган. Унинг отаси 52 ёшли Фаррух Х. ўғлининг бу ишидан ғазабланиб, ўғлини кечки пайт Сергели-4 массивида кўриб қолганда уни уришиб, ўғлига бадан шикастлари етказган. Сирожиддин Э. шифохонага мурожаат қилган.
Мазкур факт асосида Маъмурий жавобгарлик тўғрисидаги кодексининг 183-моддаси (майда безорилик) бўйича баённома расмийлаштирилган.
«Ҳурматли ҳамшаҳарлар ва Тошкент меҳмонлари! Келишмовчиликларни куч билан ҳал қилиш керакли натижа бермайди. Айниқса, улғайиб қолган фарзандларингизнинг тарбиясида бундай услуб самарасиздир. Қариндошлар орасида келишмовчилик чиққанда сиз доим ҳудудий профилактика инспекторлари ёрдамида Тошкент шаҳар ИИББ психологларига мурожаат қилишингиз мумкин», — дейилади шаҳар ИИББ хабарида.
Изоҳ (0)