Navoiy viloyatida yashovchi shaxslar ijtimoiy tarmoqqa Alisher Navoiy haykaliga nisbatan hurmatsizlik qilgan videosini joylagan. Bu haqda “Zamon” informatsion dasturida ma’lum qilindi.

Qayd etilishicha, Navoiy viloyatida yashovchi 2000-yilda tug‘ilgan yoshlar yangi oyoq kiyim sotib olib Alisher Navoiy haykali yaqinida raqsga tushgan va shoirga nisbatan tahqirlovchi masxaraomuz gaplar bilan hurmatsizlik qilgan.

Videoda tasvirga olayotgan shaxs Navoiy haykaliga yuzlanib “Maska qani, boboy” deya haykalga hurmatsizlik qiladi. Uning “raqqos” sherigi esa bu gapga miriqib kuladi.

Video ijtimoiy tarmoqlarda tarqalib, turli muhokamalarga sabab bo‘ldi.

Holat Navoiy shahri ma’muriy sudida muhokama qilindi. Aniqlanishicha, video 25-mart kuni suratga olingan. Video mualliflari bo‘lgan Suhrob Samandarov va Jamshid Yakubov o‘z qilmishidan afsusda ekanini ta’kidlagan.

“Bu videoni olishdan maqsad Alisher Navoiy bobomizni tahqirlash va karantin qoidalarini atayin buzish emas. Shunchaki o‘ylamay yoshlik qilib, qiziqib olingan video”, – deydi Jamshid Yakubov sud zalida.

Sudning qaroriga ko‘ra, ularga Ma’muriy javobgarlik kodeksining 54-moddasi 1-qismiga (Karantinli sharoitida vakolatli organning maxsus talablariga zid ravishda jamoat joylarida niqobsiz bo‘lish) asosan bazaviy hisoblash miqdorining bir barobarida jarima jazosi hamda 183-moddaga (Mayda bezorilik) asosan 5 sutka miqdorida ma’muriy qamoq jazosi tayinlandi.