Американинг машҳур Levi’s ҳамда Даниянинг Ganni брендлари ҳамкорликда эски ва қайта ишланган матодан яратилган коллекцияни тақдим қилди. Esquire’нинг ёзишича, мазкур либослар сотувга қўйилмайди, кийиш учун ижарага берилади.
Таъкидланишича, Love better деб номланган ушбу коллекцияни яратишдан мақсад ортиқча ишлаб чиқариш билан боғлиқ муаммоларга эътибор қаратиш ва апсайклинг, яъни кийим-кечакларни иккиламчи ишлаб чиқаришни қўллаб-қувватлаш, либосларни сотишдан кўра ижарага беришни тарғиб қилишдан иборат.
Ҳар бир либосга мато қаердан олингани ва тикилгани ҳақида маълумот қайд қилинган ёрлиқлар ёпиштирилган, дейилади хабарда. Коллекциядан бир неча хил услубда кийиш имконияти мавжуд бўлган жинси, кўйлак ва либослар ўрин олган. Жинсиларга қадалган икки қатор тугмалар туфайли уни хоҳишга қараб эркин ёки тор услубда кийиш мумкин. Кўйлаклар эса кенг ва катта ёқалар билан безатилган.
Нархи 55 доллардан бошланадиган кийимлар Ganni Repeat махсус платформаси орқали ижарага берилади. Ganni кийимларни қайта ишланган қути ва пакетларда етказиб берилиши ҳамда кийилган либосни кимёвий тозалаш экологик тарзда амалга оширилишини назорат қилади.
Изоҳ (0)