Либос танлашда фақатгина ўлчам, сифат ва рангдан ташқари уни тўлдириб турувчи бошқа кийимларни ҳам инобатга олиш керак. Акс ҳолда янги харид қилинган либос қанчалар гўзал ва замонавий бўлмасин, мос келмаган қўшимча пойабзал ёки бош кийим туфайли ҳар қандай инсонни дидсиз кўрсатиши мумкин.
Тиззадан юқорида турувчи этик ва тиззадан пастга тушиб турувчи юбка
Масалан, узун этиклар нисбатан калтароқ ва кенг бичимдаги юбкалар билан мос тушади. Бундай классик ва оддий узун юбка билан калта этикларни кийиш тавсия этилади. Агар юқоридаги комбинациядан фойдаланилса, бўйни паст ҳамда қоматни беўхшов, ҳатто қўпол кўрсатиши турган гап.
Калта футболка, клёш жинси шим ва баланд пошнали пойабзал
Агар торайтирилган шим ва узун кофта танланса, ҳеч қандай савол туғилмайди. Лекин кенг ёки клёш шим билан бирга, жуда ҳам калта футболка умуман бир-бирини тўлдирмайди. Ҳатто мукаммал қомат эгаси ҳам шундай комбинациядан фойдаланса, вазнига ортиқча вазн қўшилади, бўй эса чиндан ҳам пасаяди.
Ёрқин рангли кўйлак ва пошнали қора туфли
Асло бирлаштириб бўлмайдиган нарсалар. Қора ранг барча либосларга мос тушиши мумкин, аммо ёзги енгил либосга эмас. Иккаласи бир-бирига шунчалар зидки, ташқаридан қаралганда жуда ҳам хунук кўринади. Бу каби нафис либос билан қора бўлса-да, очиқ ва ингичка тасмали оёқ кийим кийган афзал.
Трикотаж болеро ва ҳар қандай либос
Трикотаж матодан ёки тўқилган болеро ҳар қандай кўринишга путур етказади. Фақатгина уни ҳеч нарса билан киймаслик тавсия этилади. Тамом.
Берет ёки шляпа ва узун куртка
Берет жуда инжиқ бош кийим ҳисобланади. Қўлни бир силкитишда «қиз бола»дан «хола»га айланиб қолиш истаги бўлмаса, бундай услубда асло кийинмаслик зарур. Берет ва шляпа, албатта, классик услуб бўлиб, у палтолар билан ҳамоҳанг образ яратади. Узун ва пахмоқ курткаларга эса иссиққина қалпоқ кийиш тавсия этилади.
Кенг бичимли кофта ва боғичли бежирим туфли
Одатда қомати олма шаклидаги қизлар шундай кенг бичимдаги кофталарни кийишни хуш кўради, сабаби у қоматдаги камчиликларни яширади, деб ўйлашади. Унга умуман мос бўлмаган ингичка пошнали бежирим оёқ кийим эса қоматнинг шаклини баттар бўрттириб юборади.
Классик услубда пальто ва угги
Угги этиклари аслида шаҳар учун мўлжалланган эмас. У шаҳардан ташқари дам олиш ёки қишлоқ жойлар учун жуда қулай. Шунинг учун ҳам угги этиги ва классик услубдаги узун пальтони бирга тасаввур қилиш қийин. Агар ҳаво жуда совуқ бўлса, пальтонинг ўрнига теридан тикилган калтароқ кийим кийиш керак.
Изоҳ (0)