Ўзбекистондаги коронавирусга чалинган одамларни даволаш бўйича вақтинча ташкил этилган шифохоналар қатор тузилмаларга бириктирилди

Вазирлар Маҳкамасининг 2020 йил 8 августдаги «Коронавирус инфекциясини юқтирган беморларга тиббий ёрдам кўрсатиш самарадорлигини ошириш чора-тадбирлари тўғрисида»ги 461-сон қарори қабул қилинди, дея хабар бермоқда Норма.

Маълум қилинишича, қарор билан Соғлиқни сақлаш вазирлигининг Зангиота туманида ихтисослашган тиббиёт мажмуалари негизида коронавирус инфекцияси билан касалланган беморларни даволашга мўлжалланган махсус «1-сон Зангиота» ва «2-сон Зангиота» шифохоналарини ташкил этиш тўғрисида таклифига розилик берилди.

Қарорда:

• коронавирус инфекцияси билан касалланган беморларни даволашга мўлжалланган махсус «1-сон Зангиота» ва «2-сон Зангиота» шифохоналари тузилмаси;
• махсус «1-сон Зангиота» ва «2-сон Зангиота» шифохоналарида беморларга хизмат кўрсатиш учун зарур бўлган тиббиёт ходимлари ва бошқа ходимларнинг нормативлари тасдиқланди.

Белгиланишича, махсус шифохоналар:

• Соғлиқни сақлаш вазирлигининг юридик шахс мақомига эга бўлган давлат муассасаси шаклидаги таркибий бўлинмаси ҳисобланиб, мустақил балансга ҳамда шахсий ғазна ҳисобварақларига эга бўлади;
• ушбу шифохоналарнинг директори ва унинг ўринбосарлари соғлиқни сақлаш вазири томонидан лавозимга тайинланади ва лавозимдан озод этилади;
• малакали тиббий хизматлар кўрсатишни ташкил этиш мақсадида бошқа тиббиёт муассасаларидан тиббиёт ходимлари, ёрдамчи ва техник ходимларни жалб қилиш ҳуқуқига эга.

Тошкент шаҳрида ва Тошкент вилоятида коронавирус инфекциясини юқтирган шахсларни даволаш мақсадида ташкил этиладиган вақтинчалик шифохоналар қуйидаги муассаса ва тузилмаларга бириктирилади:

• Ўзбекистон гимнастика федерациясининг «Универсал» спорт мажмуаси (750 ўринга мўлжалланган) – ИИВнинг марказий госпиталига;
• «Ўзэкспомарказ» МКК АЖ 1 ва 2-сон павилони (814 ўринга мўлжалланган) – Мудофаа вазирлигининг марказий ҳарбий клиник госпиталига;
• «Ўзбекистон темир йўллари» АЖнинг «Назарбек» соғломлаштириш маскани (350 ўринга мўлжалланган) – Миллий гвардия ва «Ўзбекистон темир йўллари» АЖга;
• Ёшлик спорт мажмуаси (520 ўринга мўлжалланган) – ДХХнинг марказий ҳарбий госпиталига;
• «Ўзэкспомарказ» МКК АЖ 3 ва 4-сон павилони (1000 ўринга мўлжалланган), Сергели туманидаги 2-сон Болалар ва ўсмирлар спорт мактаби (250 ўринга мўлжалланган), Олимпия захиралари спорт саройи (500 ўринга мўлжалланган) — Тошкент шаҳар ҳокимлигига.

Шунингдек, қарорда махсус ва вақтинчалик шифохоналар фаолиятини ташкил этиш, асбоб-ускуналар, дори воситалари билан таъминлаш, молиялаштириш ва моддий-техник таъминлаш, тиббиёт ходимларини моддий рағбатлантириш тартиби ёзилган.

Марказий ва оилавий поликлиникалар негизида ташкил этиладиган махсус поликлиникалар («COVИД марказ») ходимларининг лавозим маошига 6 фоиз миқдорида ҳар кунлик қўшимча тўловлар ўрнига қуйидаги миқдорларда ҳар ойлик моддий рағбатлантириш тўловлари белгиланди:

• врач ходимларга — 2,5 миллион сўм;
• ўрта тиббиёт ходимларига — 1,5 миллион сўм;
• кичик тиббиёт ходимларига — 1 миллион сўм;
• бошқа ходимларга — 500 минг сўм.

Амбулатор поликлиникалар қошида ташкил этилган мобил бригадалар ходимларига тунги вақтда ва байрам кунлари ишлаганлиги учун назарда тутилган миқдорларда ҳақ тўланиши кўзда тутилган.

Шифохоналар, беморлар билан алоқа қиладиган тиббиёт, санитария-эпидемиология хизмати ходимлари ва бошқа ходимларга ҳар 14 кунлик фаолият даври учун Президентнинг «Коронавирус инфекцияси тарқалишига қарши курашишга жалб қилинган тиббиёт ва санитария-эпидемиология хизмати ходимларини қўллаб-қувватлашга оид қўшимча чора-тадбирлар тўғрисида» 2020 йил 26 мартдаги ПҚ-4652-сон қарорига мувофиқ махсус қўшимча рағбатлантириш тўловлари тўланади. Шифохоналар раҳбарларига мазкур тўловларни заруратга қараб, кунбай тарзда тўлаш ҳуқуқи берилди.

Транспорт вазирлигига соғайиб чиққан беморларни ҳамда шифохоналарнинг тиббиёт ходимларини ташиш учун керакли миқдорда автобуслар ажратиш топширилди.

Божхона қўмитасига Соғлиқни сақлаш вазирлиги билан биргаликда коронавирус инфекцияси тарқалишининг олдини олиш бўйича чора-тадбирлар доирасида мурувват ёрдами тариқасида юборилган ва лозим даражада расмийлаштирилмаган ҳомийлик ёрдами ва юкларни истисно тариқасида, божхонадан чиқарилиши ва тақсимланиши бўйича зарур амалий ёрдам кўрсатиш топширилди.

Ҳужжат 2020 йил 4 август куни кучга кирди.

Аввалроқ Тошкентда ташкил қилинган COVID-19 беморларини тақсимлаш марказлари куч тузилмаларига бириктирилгани ҳақида хабар берилган эди.