Ўзбекистон Президенти Шавкат Мирзиёев топшириғи билан моддий ёрдам ва кўмакка муҳтож оилалар рўйхати («темир дафтар») кенгайтирилади. Бу ҳақда ҳукуматдаги манбасига таяниб, «Gazeta.uz» хабар берди.
Президентнинг 30 июлдаги фармонида аъзолари 1,7 миллион нафардан ортиқ бўлган 400 мингдан кўпроқ оилага республика бюджетидан бир марталик моддий ёрдам кўрсатилиши белгиланган эди. Кўрсатиладиган моддий ёрдамнинг умумий миқдори 380 миллиард сўмни ташкил этади.
Маълум бўлишича, 150 мингга яқин оила ёрдам кўрсатилганидан кейин рўйхатдан чиқарилган. Рўйхатга янги киритиладиган тахминан 150 мингта оила бир марталик моддий ёрдам олади. Бунинг учун давлат бюджетидан қўшимча равишда 300 миллиард сўмдан ортиқ маблағ ажратилади.
«Темир дафтар» рўйхатлари маҳалла раислари ва секторлар раҳбарлари томонидан уйма-уй юриш орқали оилаларнинг моддий-маиший шароитларини ўрганиш йўли билан шакллантирилади, эҳтиёжмандлар маълумотлар базасига киритилади.
«Темир дафтар»ни юритишда эҳтиёжманд оилаларнинг 7 тоифаси, жумладан:
- кам таъминланган;
- ногиронлиги бўлган;
- ижтимоий ҳимояга муҳтож оилалар;
- якка-ёлғиз кексалар;
- доимий ишсиз фуқаролар;
- карантин туфайли ишсиз қолган фуқаролар;
- оғир эпидемиологик ҳудудлардан қайтариб келинган фуқароларни камбағалликдан чиқариш чоралари кўрилади.
Шавкат Мирзиёев 4 август куни бўлиб ўтган видеоселектор йиғилишида эҳтиёжманд аҳоли билан ишлашда янги, шаффоф ва адолатли тизим йўлга қўйилишини маълум қилди. Президентнинг 5 августдаги қарори билан аҳолига давлат ижтимоий хизматлари ва ёрдам тақдим этиш тартибларининг автоматлаштирилиши белгиланди.
Изоҳ (0)