Мисрдаги ўзбекистонлик талабалар Қоҳира—Тошкент—Қоҳира чартер рейсида ватанга олиб келинди
10 август куни Қоҳира—Тошкент—Қоҳира йўналишида ташкил этилган чартер рейси орқали Миср олийгоҳларида таълим олаётган талабалар Ўзбекистонга олиб келинди. Бу ҳақда Транспорт вазирлиги ахборот хизмати хабар қилган.
Хабарга кўра, чартер рейси орқали жами 164 нафар ўзбекистонлик Тошкентга қайтган. Олиб келинганлар орасида 2 ёшгача бўлган 7 нафар гўдак ҳам бор.
Шунингдек, хориждаги Ўзбекистон фуқароларини олиб келиш учун Республика махсус комиссияси томонидан коронавирус пандемияси даврида Ўзбекистон Республикасига йўловчи ташиш бўйича халқаро авиаташувларни ташкил этиш тўғрисида вақтинчалик тартибига асосан туроператорлар ва авиакомпаниялар томонидан ташкил этилган Москва—Урганч йўналишида ташкил этилган махсус чартер рейс орқали 162 нафар ўзбекистонлик Хоразм вилоятига олиб келинган.
Ушбу қатнов билан келган барча йўловчилар 10 кунлик карантин даврини ўтказиш учун меҳмонхоналарга жойлаштирилди, дейилади вазирлик ахборотида.
Аввал Ўзбекистонга келувчи хорижий сайёҳлар оқимини ошириш мақсадида туроператор ва авиаташувчиларнинг Ўзбекистонга ташкил этган чартер рейслари ҳар бир йўловчи сонидан келиб чиққан ҳолда субсидияланиши хабар қилинган.
Шунингдек, 8 август куни Республика махсус комиссиясининг қарорига мувофиқ хориждаги Ўзбекистон фуқароларини ватанга олиб келиш учун 2 августдан 16 август кунлари давомида амалга оширилиши белгиланган чартер рейсларининг парвоз йўналишига қисман ўзгартириш киритилган, Россиядан фуқароларни олиб келиш учун ташкил этилган чартер рейслар йўналиши Намангандан Тошкентга кўчирилганди.
