Ижтимоий тармоқда «Негатив 105: ДАН ходимлари болаларни тунда кўчага ташлаб кетишди» сарлавҳаси остида видео тарқалди.
Ички ишлар вазирлиги Йўл ҳаракати хавфсизлиги бош бошқармаси томонидан маълум қилинишича, ушбу видеода тасвирланган ҳолат 2020 йилнинг 7 август куни Самарқанд вилояти Каттақўрғон туманида ЙПХ ходимлари ва Epica машинаси ҳайдовчиси С.М. иштирокида содир бўлган.
Мазкур ҳолат юзасидан туман прокуратураси томонидан терговолди текширув ҳаракатлари олиб борилиб, вилоят ИИБ томонидан хизмат текшируви ўтказилмоқда.
Видеода айтилишича, 7 август куни Тошкентдан Хоразмга кетаётган Epica автомобили Каттақўрғон туманига етганда тезликни оширган. Буни кўрган ЙПХ ходимлари автомобилни қувиб тўхтатган. Шундан сўнг ЙПХ ходимлари автомобиль салонида бўлган оилага куч ишлатган.
Оила аъзоси бўлган аёлнинг айтишича, автомобиль тўхтатилгач, ЙПХ ходимлари ҳайдовчига ёпишиб кетган.
Epica ҳайдовчиси томонидан олинган видеода ҳайдовчи ички ишлар ходимлари уни урганини маълум қилган. Ҳайдовчи ва ички ишлар ходими ўртасида бўлаётган тортишувда ходимнинг ҳайдовчига шапалоқ туширгани ҳам кўринган. Бундан ташқари, машинада бўлган болаларнинг йиғи овози эшитилган.
«Шундан кейин болаларнинг олдида (ҳайдовчининг) кўзига, бошига мушт туширди. Кейин ЙПХ ходими ҳамма жойига уриб ташлади. Буни кўрган хўжайиним видеога олди. Видеога олаётган вақтида ЙПХ ходимлари келиб қўлини қайирди, оёғига уриб, қўлларини чимчилаб ташлаган. Болаларим йиғларди. Буни кўриб, биз шокка тушиб қолдик», — дея таъкидлаган аёл.
Аёлнинг сўзларига кўра, ҳолат соат 14:00 атрофида юз берган. ЙПХ ходимлари машина калитини олиб қўйган, болаларни машинага киритиб, кондиционерини ёқишга эса рухсат бермаган. Аёлнинг турмуш ўртоғига тегишли телефон ҳам олиб қўйилган.
Унинг айтишича, машинага қўшиб, оила ҳам кун иссиғида жарима майдончасига олиб борилган ва улар жарима майдончасида тунги соат 03:30 гача қолиб кетган. Видеода ҳам оиланинг тунда жарима майдончасида тургани акс этган лавҳа мавжуд.
Изоҳ (0)