“Oloy” bozori yonida koronavirusga test topshirish punkti qurilmoqda. Testlarning natijasi 24 soat ichida chiqadi

Toshkentning Yunusobod tuman “Oloy” bozori avtoturargoh hududida aholidan koronavirusga test olish va inson salomatligi hamda immunitetini tekshirish bo‘yicha tibbiyot punktlari tashkil qilinmoqda. Bu haqda tuman hokimligi matbuot xizmati xabar berdi.

Ma’lum qilinishicha, mazkur hududda aholidan COVID-19’ga test olish va uning natijalarini 24 soat mobaynida internet orqali olish imkoniyati mavjud bo‘ladi.

“Bunday markazlar Yunusobod tumanining boshqa hududlarida tashkil etilishi rejalashtirilmoqda”, — deyiladi xabarda.

Avvalroq Toshkentda COVID-19’ga moslashtirilgan shifoxonalarga koronavirusga chalingan bemorlarni yotqizish to‘xtatilgani to‘g‘risida xabar berilgandi.

Eslatib o‘tamiz, Sanitariya-epidemiologik osoyishtalik agentligi direktori Bahodir Yusufaliyev 12-iyul kuni “O‘zbekiston 24” telekanaliga bergan intervyusida testlar zaxirasida 1 millionta test mavjudligi, O‘zbekistonda 8 ta xususiy tibbiyot muassasasida koronavirusga test topshirish mumkinligini aytgan edi. Shuningdek, kuniga 20-22 mingta test olinyotgani, bu mingta aholiga nisbatan 42 tani tashkil etishi bildirilgan.