Олий ва ўрта махсус таълим вазирлиги бошқарма бошлиғи Абдували Холиқов АОКА штабида ташкил қилинган матбуот анжуманида Олий таълим муассасаларининг сиртқи таълим йўналишига ҳужжат топширган абитуриентлар ҳам 2—14 сентябрь кунлари тест синовларида иштирок этишини маълум қилди.
«Кундузги таълим йўналишларида қандай тартиб бўлса, айни шу таълим йўналишлари бўйича кечки ва сиртқи шаклларда ҳам худди шундай тартиб бўлади. Яъни тест бўладиганларида тест, ижодий имтиҳон бўладиганларида ижодий имтиҳон.
Ижодий имтиҳонлар вақти ОТМлар томонидан белгиланиб, улар ҳақидаги маълумотлар абитуриентларга етказилади.
ДТМ томонидан белгиланган низом бўйича тест бошланишидан камида 10 кун олдин рухсатномалар олиш имконияти яратилади. Рухсатномада абитуриент қачон ва қаерда тест топшириши ҳақидаги маълумотга эга бўлади», – деган Олий ва ўрта махсус таълим вазирлиги расмийси.
Эслатиб ўтамиз, аввал Ўзбекистонда иккинчи мутахассисликка ҳужжатлар қабул қилиш жараёни 2020 йилнинг 10 августидан бошланиши, олий ўқув юртларига кириш тест синовлари 2 сентябрдан бошланиб 14 кун давом этиши, бакалавр босқичининг 1, 2, 3, 4-босқич талабаларига ҳозирча сентябрь ойидан бошлаб масофавий таълим бошланиши, шунингдек, Ўзбекистондаги ОТМларда 2020 йилда контракт миқдори ўзгартирилмаслиги ҳақида хабарлар берилган.
Изоҳ (0)