Уйи тинтув қилинган яккабоғлик блогерлар — Мақсуд Музаффаров, Камил Фахриддиновлар масаласи бўйича брифинг бўлиб ўтади. Унда Қашқадарё прокуратураси ва ИИБ ҳолатни изоҳлайди. Бу ҳақда АОКАнинг вилоятдаги вакили Усмон Нусуровга таяниб, «Дарё» мухбири маълум қилди.
Таъкидланишича, брифинг 2020 йил 12 август куни соат 11:00 да бўлиб ўтади.
Маълум қилинишича, АОКАнинг Қашқадарёдаги масъули Усмон Нусуров 2020 йил 10 август куни Яккабоғ туманида бўлиб, калтакланган блогерлар билан кўришган.
«Блогерлик фаолиятини қўллаб-қувватлашга тайёрмиз. Яккабоғлик блогерларни ёлғизлатиб қўймаймиз. Ваколатимиз доирасида барча ишни амалга оширамиз», — дейди Усмон Нусуров.
Қашқадарё вилоятининг Яккабоғ туманида истиқомат қилувчи блогерлар — Мақсуд Музаффаров ҳамда Камил Фахриддиновлар карантинда Damas’лар нархи ошиб кетганидан шикоят қилган фуқаролар талабига кўра, бепул такси лойиҳасини амалга оширган. Ва бу ҳаракати учун Damas’чилар томонидан калтакланган.
Бу ҳам етмаганидек, уни калтаклаган фуқаронинг бармоғини синдиришда айбланиб, уйи тинтув қилинган.Бу ҳақда жамоатчиликка маълум қилган блогер Мақсуд Музаффаров Бош прокуратура, Ички ишлар вазирлиги ва ДХХга видеомурожаат йўллаб, ҳаёти хавф остидалиги учун ёрдам сўраган.
Салкам икки ой эътиборсиз турган муаммо Олий Мажлис Сенати раиси Танзила Норбоева эсга олганидан сўнг олдинга силжиди. Шу пайтга қадар сукут сақлаб турган АОКАнинг вилоятдаги масъуллари ҳам блогерлар ҳимоясига отланди.
Изоҳ (0)