Навоийда эски олтин конидан 230 млн сўмлик таркибида олтин мавжуд бўлган тошларни ўғирлаётган шахслар қўлга тушди

Навоий вилоятида эски кондан таркибида олтин мавжуд тошларни ўғирлаган икки нафар шахс Миллий гвардия ва ИИБ ходимларининг тезкор тадбирида қўлга олинди. Бу ҳақда ИИВ ахборот хизмати хабар қилган.

Хабарга кўра ўтказилган тезкор тадбир натижасида Учқудуқ туманида жойлашган «Айгул-партия» деб номланган эски олтин конидан таркибида олтин зарралари бўлган тошларни ноқонуний йўл билан қазиб олган Хатирчи туманида яшовчи фуқаролар Т.Ж. ва Ш.М. қўлга олинган.

Т.Ж. Ford машинасида 17 та қопга жойланган 1 264 килограмм оғирликдаги таркибида олтин зарралари бўлган майда тошларни, Ш.М. эса бошқа бир Ford’да 33 та қопга жойланган 1 654 килограмм оғирликдаги тошларни ҳудуддан олиб чиқиб кетаётганида тўхтатилган. Уларга нисбатан холислар иштирокида баённома расмийлаштирилган.

Таркибида олтин зарралари бўлган ушбу тошлар мутахассислар томонидан (1 грамми – 604 863,5 сўм белгиланган нархда) текшириб кўрилганда фуқаро Т.Ж. томонидан ўзлаштирилган 1,2 тоннадан зиёд оғирликдаги тошлардан 148 грамм (89 миллион сўм) миқдордаги олтин моддаси борлиги аниқланган. Ш.М.дан олинган 1,6 тоннадан оғир тошлардан эса 234 грамм (141 миллион сўм) миқдордаги олтин моддаси борлиги маълум бўлган.

Навоий вилояти Учқудуқ тумани ИИБ ходимлари ҳолат юзасидан суриштирув ишларини олиб бормоқда.

Аввал 2020 йил 15 майда Навоий кон-металлургия комбинати ҳудудидаги сув қувурларини ўғирлаган ва корхонага қарийб 200 миллион сўм зарар етказган шахслар қамоққа олингани, 24 майда эса Бухоро вилоятининг Қоракўл туманида жойлашган «Газлинефтқазибчиқариш» МЧЖга қарашли газ қувуридан 20 тоннадан зиёд газоконденсат хом ашёсини ўғирлаган саккиз нафар фуқаронинг ҳар бирига икки йилга озодликдан маҳрум қилиш жазоси тайинлангани ҳақида хабарлар берилган.