АОКАдаги штабда ташкил қилинган матбуот анжуманида Тошкентдаги саралаш ва тақсимлаш маркази бош шифокори Алишер Ҳожиметов коронавирусга чалинган беморларни даволаш жараёни қандай кечаётгани ҳақида маълумот берди.
«Ички ишлар вазирлиги томонидан енгил атлетика залида ташкил қилинган 750 ўринли саралаш ва тақсимлаш маркази Ички ишлар вазирлиги ихтиёрига топширилди. Ушбу марказ 1 августдан ўз фаолиятини бошлаган. Марказ, айтиб ўрганимдек, 750 кишини бир вақтнинг ўзида қабул қила олади. Шундан 390 та жой ўрта оғир, 290 таси оғир ва 90 та жой ўта оғир беморларга мўлжалланган.
Ҳозирда шифохонада 691 нафар бемор даволанмоқда. Бугунги кунгача 1500 нафардан ортиқ бемор муассасада даволаниб улгурди.
Дунёда бунақа саралаш ва тақсимлаш марказлари йўқ. Бу ҳукуматимиз ташаббуси. Намуна сифатида ташкил этилган бу марказлар ўзини тўлиқ оқлади. Бу ерда беморларни қабул қилиб, уларни саралаб, коронавирус бор-йўқлигини ажратиб, касаллик даражасига қараб даволаш чораларини кўриляпти.
Саралаш ва тақсимлаш марказларига келаётганларнинг айримларида умуман касаллик аломати йўқ. Айримларининг қўлида унда коронавирус йўқлиги ҳақида маълумотлари ҳам бор. Лекин ваҳима ҳам бор. Қўшниси, таниши ё кўча-кўйдаги одамларнинг гаплари таъсирига тушиб келаверишган.
Биз уларни тинчлантириб, тўғри йўналиш бериб, аҳвол яхши бўлса, уйига юборамиз, агар ҳолатида қандайдир ўзгариш бўлса, вақтинча сақлаб турилади», — деган Тошкент шаҳридаги саралаш ва тақсимлаш маркази бош шифокори Алишер Ҳожиметов.
Июль ойида Тошкентнинг Юнусобод туманида жойлашган «Ўзэкспомарказ» кўргазма маркази майдонларида ташкил этилаётган коронавирусга гумон қилинган беморларга аниқ ташхис қўйиш ва касаллик даражасини аниқлаш, шунингдек, беморларга биринчи ёрдам кўрсатиш ва уларни клиникаларга тақсимлаш маркази (500 ўринли) ташкил қилинган, ушбу ғоя Тошкент шаҳар ҳокими Жаҳонгир Ортиқхўжаевнинг ташаббуси экани, мазкур марказга бюджет маблағлари сарф қилинмаслиги айтилганди. 24 июлда Тошкентда COVID-19 касаллигига гумон қилинганларга аниқ ташхис қўйиш ва зарур биринчи ёрдамни кўрсатишга хизмат қилувчи тақсимлаш маркази иш бошлагани хабар қилинган.
Кейинчалик Шайхонтоҳурдаги «Ёшлик» спорт мажмуасида тақсимлаш маркази ташкил қилинган, Зангиота санаторийси коронавирусга чалинган беморларни даволаш комплексига айлантирилган, Навоийда 400 ўринли тақсимот пункти иш бошлагани, Урганч шаҳрида коронавирус юқтириб олган беморларни даволаш учун 708 ўринли махсус марказлар ташкил этилгани ҳақида хабар берилган. Бундан ташқари, Учтепа туманида жойлашган Аtlas мебель марказида коронавирусга қарши кураш доирасида навбатдаги тақсимлаш маркази ташкил этилганди.
Изоҳ (0)