Хоразм вилояти жисмоний тарбия ва спорт бошқармаси тасарруфидаги спорт таълим муассасалари иншоотлари ҳам коронавирус инфекциясига чалинган беморларни даволаш учун махсус марказларга айлантирилмоқда. Бу ҳақда Жисмоний тарбия ва спорт вазирлиги хабар қилди.
Шу кунга қадар Урганч ихтисослаштирилган олимпия захиралари мактаб-интернатининг 4 та спорт залида 708 (вазирлик ахборотида 718 ўринли дейилган) даволаш ва тақсимлаш маркази ташкил қилинганди.
Энди Хива шаҳридаги Олимпия ва миллий спорт турлари бўйича давлат ихтисослаштирилган мактаб-интернатининг кураш зали 132 нафар коронавирус ташхиси қўйилган беморларни қабул қилиши учун мослаштирилмоқда.
Мазкур вақтинчалик шифохоналарда беморлар шифокорлар назоратида бўлиб, тегишли муолажалар олади, дейилади вазирлик ахборот хизматининг хабарида.
Аввал Сурхондарёда Термиз шаҳридаги «Сурхон» спорт ҳамда «Алпомиш» кураш мажмуалари биноларида яқин кунларда 592 ўринли ташхислаш, саралаш, тақсимот пунктлари ўз фаолиятини бошлаган. Навоий шаҳридаги «Ёшлар» спорт мажмуасида пандемия даврида беморларга бирламчи тиббий хизмат кўрсатиш мақсадида 400 ўринли ташхислаш, саралаш, тақсимот пункти очилган.
Тошкентда Учтепа туманида жойлашган Атлас мебель марказида коронавирусга қарши кураш доирасида навбатдаги тақсимлаш маркази ташкил этилган.
Юнусобод туманидаги «Ўзэкспомарказ»нинг 3-павильонида 1000 ўринлик махсус марказ фаолият юритмоқда (масъул – Тошкент шаҳар ҳокимлиги). Шунингдек, 1 ва 2-павильонларда яна 814 та койка тайёрланган (масъул – Мудофаа вазирлиги госпитали).
Бундан ташқари, Юнусободдаги гимнастика саройида 750 ўринли (масъул – ИИВ госпитали), Шайхонтоҳур туманидаги «Ёшлик» спорт мажмуасида 520 ўринли (масъул – ДХХ госпитали) биринчи тиббий ёрдам марказлари фойдаланишга топширилган. Сергели туманидаги 2-сон БЎСМ 250 ўринли даволаш маскани этиб қайта жиҳозланган.
Ўзбекистон давлат жаҳон тиллари университети ётоқхонаси ва Чилонзор туманидаги Cardio Star Plus хусусий клиникаси (50 та ўрин) ҳам коронавирусга гумон қилинганларни вақтинча сақлаш масканларига айлантирилган.
Изоҳ (0)