«Ўзбекистон Республикаси транспорт вазирлиги ҳузуридаги автомобиль йўллари қўмитасининг «Автойўлинвест» агентлиги ташкил этиш тўғрисида»ги Президент қарори лойиҳаси жамоатчилик муҳокамасига қўйилди.
Транспорт вазирлиги ҳузуридаги Автомобиль йўллари қўмитаси томонидан ишлаб чиқилган ҳужжат лойиҳасига кўра, республика йўл жамғармаси негизида йўл хўжалиги соҳасида халқаро молия институтлари, хорижий ҳукумат молия ташкилотлари иштирокидаги инвестиция лойиҳаларини амалга ошириш бўйича ижрочи орган сифатида Транспорт вазирлиги ҳузуридаги Автомобиль йўллари қўмитасининг «Автойўлинвест» агентлиги фаолияти йўлга қўйилиши мумкин.
Қарор лойиҳасида агентликни республика бошқарув органи деб белгиланиши кўзда тутилган.
Шунингдек, лойиҳада агентлик марказий аппарати ходимларининг лавозим маошларини Ягона тариф сеткаси бўйича меҳнатга ҳақ тўлашнинг тасдиқланган разрядларига асосан белгилашда тариф коэффиценти 2,0 бараварга оширган ҳолда қўлланилиши кўзда тутилган.
Агентлик бошқарув ходимларининг чекланган сони – 9 штат бирлигидан иборат бўлади.
Агентлик Транспорт вазирлиги ҳузуридаги Автомобиль йўллари қўмитаси тасарруфидаги Республика йўл жамғармасининг мол-мулклари ва имзолаган шартномалари бўйича ҳуқуқий вориси ҳисобланади.
Қарор лойиҳасига кўра агентликнинг асосий вазифалари ва фаолиятининг устувор йўналишлари этиб қуйидагилар белгиланади:
йўл хўжалиги тизимини такомиллаштиришга қаратилган лойиҳаларни, шу жумладан хорижий инвестициялар, халқаро молия институтлари ва хорижий ҳукумат молия ташкилотларининг кредитлари иштирокидаги инвестиция лойиҳаларини аниқлаш, уларнинг йиллик, қисқа ва узоқ муддатли дастурларини ишлаб чиқишда иштирок этиш;
лойиҳани ишлаб чиқишда тегишли вазирлик ва идоралар билан ҳамкорлик қилиш;
йўл хўжалиги соҳасида халқаро молия институтлари ва хорижий ҳукумат молия ташкилотлари иштирокида кредит маблағларини жалб қилишда иштирок этиш;
тендер савдолари натижасида ғолиб бўлган пудрат ташкилотлар билан тегишли шартномалар расмийлаштирилишини ташкил қилиш;
лойиҳаларни амалга ошириш юзасидан тизимли мониторинг юритиш, шунингдек, пудратчи ташкилотлар томонидан йўл хўжалиги соҳаси нормалари ва қоидалари талабларига риоя этилишини таҳлил қилиш, лойиҳаларни амалга ошириш жараёнида юзага келган муаммоларни ўз ваколати доирасида бартараф этиш чораларини кўриш;
тегишли вазирликлар ва идоралар, шунингдек йўл хўжалиги соҳасидаги лойиҳаларни амалга оширишни молиялаштиришда иштирок этувчи халқаро ташкилотлар фаолиятига кўмаклашиш;
инвестиция дастури прогнозларини ўз вақтида ижросини амалга ошириш ҳамда якунланган ишларни белгиланган тартибда фойдаланишга қабул қилишни таъминлаш.
Қарор лойиҳаси муҳокамаси 2020 йилнинг 22 августигача давом этади.
2020 йил 30 июнь куни Ўзбекистон президенти фармони билан ёшлар сиёсати соҳасидаги қонун ҳужжатларига риоя этилиши устидан давлат назоратини амалга оширувчи янги орган — Ёшлар ишлари агентлиги ташкил этилган.
23 июль куни эса «Ўзбекистон Республикаси Алкогол ва тамаки бозорини тартибга солиш ҳамда виночиликни ривожлантириш агентлиги фаолиятини ташкил этиш тўғрисида»ги қарорга мувофиқ Алкогол ва тамаки бозорини тартибга солиш ҳамда виночиликни ривожлантириш агентлиги ташкил қилинган.
Изоҳ (0)