Адабиётшунос олим, филология фанлари доктори, профессор Санжар Содиқов 2020 йил 6 август куни 80 ёшида оламдан ўтди, деб ёзмоқда «Xabar.uz».
Санжар Содиқов 1940 йил 21 июль куни Тошкент шаҳрида зиёлилар оиласида туғилган. Пойтахтдаги кўзи ожиз болалар мактаб-интернатини тамомлагач, Тошкент давлат университети (ҳозирги Ўзбекистон Миллий университети)нинг филология факультетида таҳсил олган.
1965 йилдан то умрининг сўнгига қадар Мирзо Улуғбек номидаги Ўзбекистон Миллий университети, Жаҳон тиллари университети ҳамда Алишер Навоий номидаги Тошкент давлат ўзбек тили ва адабиёти университетларида ёшларга таълим берган.
Олимнинг «Оламни яшнатувчилар» (1977), «Абдулла Қаҳҳор ижоди ва адабий танқид» (1996), «Сўз санъати жозибаси» (1996), «Ижоднинг ўттиз лаҳзаси» (2005), «Янги ўзбек адабиёти тарихи» олий ўқув юртларининг сиртқи бўлимлари учун дарслик (2006), «Мўъжизалар мўъжизаси» (Озод Шарафиддинов портретига чизгилар) (2006), «Роман ва танқид» (2008), «Радиожурналистика асослари» журналистика факультетлари учун ўқув қўлланма (2010), «Ҳақиқат ва адолат қуёши» (2011), «Мамлакатшунослик асослари» журналистика факультетлари ва бўлимлари учун ўқув қўлланма (2012), «Янгича талқин мевалари» (2013), «Маҳорат чўққилари» (Ўткир Ҳошимов ижоди ҳақида) (2013), «Жадид адабиётининг қалдирғочлари» (Беҳбудий, Авлоний ва Ҳамза портретига чизгилар) дарсликка илова (2013), «Янги ўзбек адабиёти тарихи» олий ўқув юртларининг филология факультетлари учун дарслик қайта ишланган ва тўлдирилган нашри (2019) каби илмий адабиётлари ва ўқув қўлланмаларидан ОТМларда дарслик сифатида фойдаланилади.
Санжар Содиқов Ўзбекистонда хизмат кўрсатган ёшлар мураббийи унвони билан тақдирланганди. Адабиётшунос олим ҳаётининг охирги икки йилида таржима соҳасига ҳам қўл уриб, жаҳон адабиётида ўзига хос ҳодиса ҳисобланган ёзувчи Борис Пастернакнинг «Доктор Живаго» (2018), Иван Буниннинг «Арсенев ҳаёти» (2020) номли романларини ўзбек тилига таржима қилиб, китобхонлар эътиборига ҳавола қилган.
Аввалроқ 2020 йил 3 август куни таниқли сценарийнавис Маҳмуд Тўйчиев 69 ёшида вафот этгани, 4 августда ўзга сайёраликлар билан учрашгани сабаб интернет юлдузига айланган Жуманазар Раҳмонов 73 ёшида юрак хуружи туфайли дунёдан кўз юмгани, 8 августда эса таниқли композитор ва дирижёр, Ўзбекистонда хизмат кўрсатган санъат арбоби, «Ўзбеккино» миллий агентлиги Бадиий кенгаши аъзоси Анвар Эргашев 66 ёшда вафот этгани ҳақида хабарлар берилган.
Изоҳ (0)