Ўзбекистонда Beeline абонентлар сони бўйича етти йиллик устунликдан сўнг етакчиликни Ucell’га топшириб, иккинчи ўринга тушди. Бу ҳақда Uzzoom хабар бермоқда.
Қайд этилишича, 6 август куни VEON Group (Beeline Uzbekistan’нинг она компанияси) 2020 йил II чоракдаги операцион ва молиявий фаолияти якунларини эълон қилди. Экспертлар тахмин қилганидек, Unitel МЧЖ абонент базаси камайишда давом этган: Beeline’га уланган SIM карталар сони кетма-кет ўнинчи чоракдан бери камайган.
Beeline абонентлари салбий динамикаси узоқ вақт бир чоракда 50-100 мингтадан ошмаган. 2019 йил мартдан бошлаб бу сон уч бараварга ўсган. Бундан бир йил аввал Beeline 8 669 199 нафар абонентга хизмат кўрсатган бўлса, бугунга келиб улар сони қисқариб, 7 091 302 нафарни ташкил қилмоқда.
Нашрга кўра, Unitel’даги манбалари таназзулнинг асосий сабаблари қаторида бошқарувдаги инқирозни ва маркетологларнинг, овозли хабар ва интернетдаги рақобатбардош тариф режалари зарарига, кўпроқ қўшимча digital-сервисларга эътибор қаратганликлари ўзини оқламаганлигини келтирмоқда.
«Кейинги ойларда ‘сариқ-қора’лар ўзларига хос бўлмаган ‘етиб олувчи’ ролини ўзлаштиришга – ўз нарх таклифларини рақобатчилар янгиликларига мослаштириб боришга мажбур бўлдилар, бу эса якуний натижага таъсир кўрсатмай қолмади. Шубҳасиз, COVID-19 авж олиши туфайли Beeline Call-марказининг ёпилиши билан боғлиқ оммавий можаро ҳам изсиз ўтмади, лекин кескин таназзулнинг асосий омили Unitel’нинг паст даромадли деб ҳисоблаш урф бўлган абонентларга муносабати бўлди», — дейилади хабарда.
Ucell тақдим этган ахборотга кўра, ушбу операторнинг абонентлар базаси 7 940 000 нафарни ташкил қилади. Бу ўз навбатида компанияни мижозлар сони бўйича биринчи ўринга олиб чиқади.
Аввалроқ ҳам Ucell TeliaSonera корпорациясининг бир қисми бўлган даврида қисқа муддат шундай натижага эришган. Бу 2012 йилда – МТС инқирозидан сўнг рўй берган.
«Бироқ қайд этиш керакки, мана бир ярим йилдан бери Ucell давлат оператори саналади ва бу камида телекоммуникацион тармоқдаги давлат бошқаруви самарадорлигига нисбатан анъанавий салбий қарашларни ўзгартиришга мажбур қилади», — дейилади хабарда.
Uzmobile ривожланиш динамикаси ҳам шуни кўрсатаётгани таъкидланган. Ярим йиллик якунларга кўра, «Ўзбектелеком» GSM бўлинмасининг абонентлар базаси 5 850 000 дона SIM картани ташкил қилган. Агар компания шу суръатни сақлаб қолса, у йил охирига бориб Beeline билан бозордаги улуш ҳажми бўйича иккинчи ўрин учун рақобатлашиши мумкинлиги қайд этилган.
Шунингдек, 3 000 000 абонентга эга Mobiuz ҳам алоҳида эътиборга лойиқлиги билдирилган. Экспертлар бу оператордан етакчилик учун пойгада иштирокни эмас, балки олдинроқ эълон қилинган стратегия – рақамли давлат хизматларини ривожлантириш ва республикани тезкор мобил интернет билан қоплашни кутаётгани таъкидланган.
Маълумот учун, 2018 йил декабрида Coscom (Ucell бренди) мобил операторининг 94 фоиз акцияларига эгалик қилувчи Telia швед-фин компанияси ўзининг барча улушини 215 миллион доллар эвазига Ўзбекистон Давлат рақобат қўмитасига сотган ва Ucell давлат компаниясига айланган.
2019 йилда Ucell уяли алоқа оператори ўз улушини сотиш ёки уни хорижий компанияларга ишончли бошқарувга топшириш бўйича музокаралар олиб бораётганлиги ҳақидаги хабарлар тарқалган, компания бу хабарларни рад этган.
Изоҳ (0)