Тошкент вилоятининг Бекобод туманида маҳалла раиси ўз ҳудудида яшамайдиган ва муҳтож бўлмаган фуқароларга сохта маълумот асосида нафақа пули тайинлагани аниқланди. Бу ҳақда Бош прокуратура матбуот хизмати хабар берди.
Қайд этилишича, «А» МФЙ раиси Х.Ғ. томонидан ҳужжатларга сохта маълумотлар киритилиб, ҳақиқатда мазкур маҳаллада яшамайдиган ва нафақага муҳтожи бўлмаган 26 нафар фуқарога жами 101,5 миллион сўм нафақа пуллари тайинлаган. Шундан 31,6 миллион сўм маблағ фуқароларга асоссиз тўлаб берилган.
Шунингдек, департаментнинг Бекобод тумани бўлими томонидан ўз вақтида олиб борилган ўрганишлар натижасида 69,9 миллион сўмлик бюджет маблағлари талон-торож қилинишининг олди олинган.
Мазкур ҳолат юзасидан маҳалла раиси Х.Ғ.га нисбатан Жиноят кодексининг 167 (ўзлаштириш ёки растрата йўли билан талон-торож қилиш) ва 209-моддаси (мансаб сохтакорлиги) билан жиноят иши қўзғатилиб, тергов ҳаракатлари ўтказилмоқда.
Аввалроқ Ўзбекистонда ёрдам пули тарқатилишига оид эътирозли видеолар тарқалгани, Маҳалла вазирлиги хавотирга ўрин йўқлигини билдиргани ҳақида хабар берилган эди.
Изоҳ (0)