«Ўзкомназорат» давлат инспекцияси Ўзбекистонда Telegram’да турли телефон рақамларига махфий кодлар воситасида ахборотларни ўғирлаш мақсадида фирибгарларнинг ҳужумлари кузатилгани ҳақида хабарлар тарқалганига муносабат билдирди.
Инспекция ахборот хизматининг қайд этишича, Ўзбекистонда Telegram фойдаланувчиларининг аккаунтларига кириб олиб, шахсий маълумотларни ўғирлаш ёки аккаунтни қайтариб бериш эвазига мўмай пул ишлашга уринаётган мобил фирибгарлар пайдо бўлган ва бу каби вазиятлар ҳақида ижтимоий тармоқ фойдаланувчилари ҳам маълум қилган.
«Фирибгарлик схемасига кўра фойдаланувчига мобил алоқа операторининг расмий рақамидан қўнғироқ қилиниб, COVID-19 коронавирус инфекцияси ҳақида ўта содда ва жавоби осон саволлар бериладиган қисқа викторина ўтказилади. Ғолибга пул ўтказиб бериш ваъда қилинади. Фойдаланувчи ютуғини олиши учун Telegram’га келган махфий кодни айтиши лозим. Мессенжерга келган сирли рақамни ошкор қилиш, фирибгарларнинг аккаунтга кириб олишига шароит яратади. Блогер ёки канал администраторининг аккаунтига кириб олган фирибгар у ердаги маълумотларни ошкор қилмаслик учун пул талаб қила бошлайди. Оқибатда ўзини викторина ғолиби бўлдим, деб ўйлаган фойдаланувчи фирибгарлик қурбонига айланади», – дейилади «Ўзкомназорат» давлат инспекциясининг хабарида.
Мутахассислар тавсиясига кўра, бу каби ҳолатларнинг олдини олиш учун Telegram’да икки томонлама аутентификацияни ўрнатиш зарур. Бу Telegram’дан келган махфий рақамдан ташқари аккаунт паролини ҳам киришни сўрайдиган ҳимоя тизими.
Инспекция хабарига кўра, шунга ўхшаш фирибгарлик схемалари МДҲга аъзо бошқа мамлакатлар ҳудудларида ҳам кузатилган.
Инспекция Telegram фойдаланувчиларидан ахборот хавфсизлиги бўйича тавсияларга риоя қилишни, телефон орқали бегона рақамдан қўнғироқлар бўлиб, шубҳали викториналар ўтказилиш ҳолатлари кузатилганида мессенжер орқали махфий код юборилиб, уни айтиш сўралганида бегона шахсларга маълумотни ошкор этмасликни, фирибгарлик схемаларидан огоҳ бўлишни сўраган.
2020 йил май ойида сурхондарёлик ногиронлиги бўлган шахснинг пластик картасига эҳсон қилишини айтиб, унинг ҳисобидаги пулларни ечиб олган 17 ёшли ўсмир ушлангани, 28 июнда Telegram’да одамларнинг 19 миллион сўмдан кўпроқ пулини ўғирлаган фарғоналик 21 ёшли фирибгар қўлга тушгани, 25 июлда эса Wоrld Crypto Cаpital компанияси раҳбари Алексей Менг Ўзбекистонда 2 мингдан ортиқ фуқаронинг жами 1,7 миллион долларини қўлга киритиб, мамлакатдан чиқиб кетгани, 31 июлда эса «Одноклассники»да қиз бола номидан 26 ёшли йигит билан танишиб, уни «шантаж» қилиб 5 миллион сўм сўраган шахс қўлга тушгани ҳақида хабарлар берилган.
Изоҳ (0)