Қарши шаҳрида ягона бўлган нодавлат телевидение — Nasaf TV Қарши шаҳар ҳокимлиги масъуллари сабаб ерсиз, бошпанасиз қолмоқда. Бу ҳақда «Дарё»га шикоят қилган телевидение директори, «Қарши телерадиоканали» МЧЖ раиси Дилноза Мамадалиеванинг айтишича, шаҳар ҳокимлиги телевидение учун бино қуриш учун берилган ерни эндиликда тадбиркорга олиб берган.
«Қарши шаҳар ҳокимлиги 2011 йил 27 январь куни Nasaf TV ҳамда Nasaf FM радиосига шахсий бино қуриш учун тўлқинларни эфирга узатишга қулай бўлган Қарши шаҳридаги ягона телеминора жойлашган 4-кичик туман — Чўлқувар маҳалласи ҳудудидан 1700 квадрат метр ер берганди. Эндиликда эса бизга берилган ер тадбиркорга ҳам берилган бўлиб чиқмоқда. Ер бериб юборилгачгина бундан хабар топяпмиз», — дейди телевидение директори Дилноза Мамадалиева.
Маълум бўлишича, шаҳар телевидениеси қурилиш учун банкдан кредит ололмагани боис ажратиб берилган ерда қурилиш ишларини бажаролмаган.
«Ўз вақтида банкдан кредит ололмаганимиз ва иқтисодий аҳволимиз имкон бермагани учун қурилиш ишларини бажаролмадик. Қурилиш ишлари кечикаётгани ҳақида шаҳар ҳокимлигига маълум қилиб, қарор муддатини узайтириб беришларини сўрадик. Аммо бизнинг аҳволимиздан фойдаланган амалдаги масъуллар ерни ими-жимида тадбиркорга бериб юборишгани маълум бўлди», — дейди Дилноза Мамадалиева.
Телевидение журналисти, «Севимли» каналининг вилоятдаги мухбири Шавкат Аминовнинг таъкидлашича, ҳамкасблари бир неча йилдан бери ижарада туриб фаолият юритишга мажбур.
«Шаҳарда атиги битта нодавлат телевидение бор. Буни қарангки, шу канал ҳам биносиз. Ижарама-ижара сарсон бўлиб юрибди. Ўз шахсий биносига эга бўлиш мақсадида берилган ер ҳам бугун тадбиркорга бериб юборилган. Телевидение бу ерини йўқотса, яна бир неча йил давомида ижарама-ижара юришга мажбур бўлади», — дейди Шавкат Аминов.
Таъкидланишича, 27 йилдан бери фаолият юритаётган телевидение ўтган фурсат давомида кўплаб истеъдодларни тарбиялаган. Жамият ҳаётига оид долзарб мавзуларни кўтариб, аҳоли ҳаётидаги муаммоларнинг ечим топишида кўмаклашган.
Телевидение масъулларининг маълумот беришича, шаҳар ҳокимлиги томонидан берилган 1700 квадрат метр ер ҳокимнинг 2019 йил 14 майдаги қарори билан «Муборак экспресс қурилиш» МЧЖга кўп қаватли уй-жой қуриш учун берилган.
«Шаҳар ҳокимлиги масъуллари шу даражада айёрки, биз 2019 йил 17 июль куни уларга мурожаат қилиб, қурилиш ишларимиз кечикаётгани сабаб қарор муддатини узайтириб беришни сўрагандик. Улар шаҳар марказида бўш ер борлигини билиб қолишди, шекилли, 2019 йил июль ойида май ойи санаси билан қарор чиқариб, бизга берилган ерни тадбиркорга бериб юборди. Ҳолбуки, қарор муддатини узайтириб беришни сўраб ҳокимликка мурожаат қилганимизда ҳокимнинг ўша пайтдаги ўринбосари Улуғбек Авазов барча ҳужжатларни тақдим қилишимиз, тез орада қарор муддатини узайтириб беришларини айтганди», — дейди Дилноза Мамадалиева.
Қарши шаҳар ҳокимининг қурилиш масалалари бўйича ўринбосари айни кунда даволанишда бўлгани учун ҳокимлик ходими — мазкур масалага масъул Дилшод Жалолов билан суҳбатлашдик.
«Бу масалада ҳеч ким аниқ гап айтолмайди. Ўша пайтда нима бўлган, нима учун бунақа муаммо келиб чиқяпти, бизга қоронғи. Боиси бу ишлар билан шуғулланган ҳокимлик ходимлари айни кунда ишдан бўшаб кетган. Ҳозир биз фақат суд қарорида келтирилган гапларни айтишимиз мумкин», — дейди Дилшод Жалолов.
Аниқланишича, Қарши шаҳар ҳокимининг телевидениега берилган ерни «Муборак экспресс қурилиш» МЧЖга бериш ҳақидаги 2019 йил 14 майдаги қарори суд томонидан ҳақиқий эмас деб топилгач, шаҳар ҳокимлиги 2019 йил 16 декабрь куни телевидениега 2011 йил берилган ерни ҳокимлик захира фондига қайтариш ҳақида қарор чиқарган. 2020 йил 10 январь куни эса ерни «Муборак экспресс қурилиш» МЧЖга бериш ҳақида қарор имзоланган. Шу-шу телевидениега берилган ер тадбиркорга бериб юборилган.
Қарши шаҳар телевидениеси масъуллари эса шаҳар ҳокимининг хатти-ҳаракатидан норози бўлиб, судга мурожаат қилган ва ҳокимнинг 2019 йил 16 декабрь ҳамда 2020 йил 10 январдаги қарорларини ҳақиқий эмас, деб топишни сўраган.
Мазкур ишни кўриб чиққан Қарши шаҳар маъмурий суди телевидение даъвосини рад этгач, журналистлар шаҳар маъмурий суди қароридан норози бўлиб, вилоят маъмурий судига кассация тартибида шикоят киритган. Таассуфки, вилоят судьялари ҳам телевидение даъвосини рад қилган.
«Ҳар иккала суд ҳам бизнинг даъвомизни рад этди. Эндиликда биз яна ерсиз, бошпанасиз қоляпмиз», — дейди телевидение журналистлари.
Телевидение директори Дилноза Мамадалиеванинг қўшимча қилишича, улар мазкур масалада вилоят раҳбари Зоир Мирзаевга ҳам мурожаат қилиб, оғир аҳволда қолишганини, телевидение учун бино зарурлигини таъкидлаб, шаҳар телевидениесига ёрдам берилишини илтимос қилган.
«Шу пайтгача вилоят ҳокимлигидан ҳам бирор-бир жавоб олмадик. Вилоят раҳбари бизнинг муаммога эътибор қаратмаяпти», — дейди телевидение ходимлари.
Эслатиб ўтамиз, аввалроқ телевидение ҳамда ҳокимлик ўртасидаги ер можаросини кўриб чиқаётган суд ишини ёритишга келган «Севимли» телеканали мухбирига вилоят маъмурий суди томонидан хусусий ажрим чиқарилгани, бироқ судьялар айтган гапидан қайтиб қолишгани ҳақида хабар берилганди.
Афсуски, мазкур ҳолатга Олий суд ҳам эътибор қаратмади.
Тез орада вилоят ҳокими Зоир Мирзаевнинг телевидение муаммосига, Олий суднинг эса айтган гапидан қайтадиган судьялар масаласига эътибор қаратишидан умидвормиз.
Изоҳ (0)