Юрген Клопп Adidas билан шартнома имзолади. «Ливерпуль»нинг ҳомийси эса Nike

«Ливерпуль» бош мураббийи Юрген Клопп ўзининг шахсий экипировкасига эга бўлади.

The Telegraph нашрига кўра, германиялик мутахассис Нике компаниясининг асосий рақобатчиси — Аdidas билан шартнома имзолаган. Қайд этиш жоиз, Nike 2020/21 йилги мавсумдан бошлаб «Ливерпуль»ни либослар билан таъминлайди.

Манбада айтилишича, мураббийлар орасида Клоппдан ташқари фақатгина Жозе Моуриньонинг брендлар билан шахсий шартномаси бор. «Тоттенҳэм» устози ҳам Аdidas либосларидан фойдаланади.

Яқин бир неча кун ичида немис компанияси ва Клоппнинг ҳамкорлик қилишни бошлаганлиги тўғрисида эълон қилиниши кутилмоқда.

Ҳозирча шартнома тафсилотлари ошкор қилинмаган.

Маълумот учун, Клопп 2015 йилдан бери «Ливерпуль»га устозлик қилади. Шу йиллар мобайнида у тўртта мусобақада: Чемпионлар Лигаси, УЕФА Суперкубоги, клублар ўртасидаги Жаҳон чемпионати (барчаси 2018/19 йилги мавсумда) ва 2019/20 йилги мавсумда Премьер Лига мусобақасида ғолиб чиқди.