Қашқадарё вилояти ҳокими Зоир Мирзаев онлайн тарзда аппарат йиғилиши ўтказиб, қатор тайинловларни ўқиб эшиттирди. Бу ҳақда вилоят ҳокимлиги матбуот хизмати хабар берди.
Маълум қилинишича, «Қишлоқ қурилиш банк» акциядорлик тижорат банки бошқаруви раисининг биринчи ўринбосари вазифасида ишлаб келаётган Акбар Эшонқулов Қашқадарё вилояти ҳокимининг саноатни ривожлантириш, капитал қурилиш, коммуникациялар ва коммунал хўжалик масалалари бўйича ўринбосари лавозимига тайинланган.
2019 йилдан Қашқадарё вилояти ҳокимининг ўринбосари — вилоят инвестициялар ва ташқи савдо бошқармаси бошлиғи котибияти мудири вазифасини бажарувчи вазифасида бўлган Шоҳжаҳон Омонов эса Ёшлар ишлари агентлиги Қашқадарё вилоят бошқармасига раҳбар этиб тайинланган.
Бўрибой Домотов Қашқадарё вилоят ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари котибияти етакчи мутахассиси, Улуғмурод Лутфуллаев Қашқадарё вилояти ҳокимининг ўринбосари — вилоят инвестициялар ва ташқи савдо бошқармаси бошлиғи котибияти 1-тоифали мутахассиси лавозимига тайинланган.
«Шунингдек, йиғилишда вилоят халқ таълими бошқармаси раҳбари Абдуғани Ҳимматовга тизимда куз-қиш мавсумига тайёргарлик ишларида йўл қўйган камчиликлари учун ҳайфсан берилди», — дейилади хабарда.
Шу йилнинг февраль ва апрель ойларида ҳам Қашқадарё ҳокими Зоир Мирзаевга икки нафар ўринбосар тайинланган эди.
Изоҳ (0)