Навоий вилояти ҳокими Қобул Турсунов 27 июлидан буён Тошкент шаҳрида даволанмоқда. Бу ҳақда вилоят ҳокимлиги ахборот хизмати хабар берди.
Қайд этилишича, Қобул Турсунов ўтган 4 кун давомида малакали тиббиёт мутахассислари томонидан Соғлиқни сақлаш вазирлиги тавсияларига мувофиқ ишлаб чиқилган стандартлар асосида даволаш курсларини ўтамоқда.
«Навоий вилояти ҳокими тўлиқ даволаниб, яқин кунларда иш фаолиятини давом эттиради», — дейилади маълумотда.
Шу билан бирга, хабарда Навоий вилояти ҳокими айнан қайси касалликдан даволанаётганига аниқлик киритилмаган.
Аввалроқ, Бухоро вилоятининг собиқ ҳокими, ҳозирда бош вазир ўринбосари бўлган Ўктам Барноев коронавирусга чалиниб даволанаётгани, шунингдек, Бухоро вилояти ҳокими вазифасини бажарувчи Карим Камоловда ҳам коронавирус аниқлангани хабар қилинганди.
Эслатиб ўтамиз, 18 июль куни Қорақалпоғистон Жўқорғи Кенгеси раиси, сенатор Муса Ерниязов ва Сурхондарё вилояти ҳокими Тўра Боболовнинг коронавирус юқтириб олгани ҳақида хабар берилганди. Ерниязов Нукусда, Боболов эса Тошкентда даволанаётгани ва уларнинг аҳволи барқарор эканлиги ҳам маълум қилинган. 30 июль куни АОКАда ўтказилган матбуот анжуманида Муса Ерниязовнинг аҳволи оғир, у сунъий нафас олдириш аппаратига улангани маълум қилинди.
Изоҳ (0)