Хоразм вилояти йўл ҳаракати хавфсизлиги бошқармаси (ЙҲХБ) томонидан 25—26 июль (шанба-якшанба) кунлари ўтказилган рейд тадбирларида қонунбузарликка йўл қўйиш ҳолатлари аниқланган. Бу ҳақда маҳаллий телеканалда махсус лавҳа эфирга берилган.
Республика махсус комиссияси қарорига кўра, махсус рухсатномаси бор ёки стикерсиз юриш ҳуқуқига эга бўлган автомашиналардан ташқари барча транспорт воситалари ва йўналишсиз таксилар ҳаракати чекланганди.
Тадбирлар давомида Хива туманида Lacetti тўхтатилиб, ҳайдовчидан транспорт воситасини бошқариш ҳуқуқини берувчи ҳужжатлар ва махсус рухсатнома сўралган. Ҳайдовчи ҳайдовчилик гувоҳномасини берган, бироқ бошқа ҳужжатларни йиртиб, машинаси устига отиб юборган.
Видеода ҳайдовчининг: «Мени видеога оляпсанми, мана қара, мана ‘доверенност’ шу машинаники. Машинани бериб юбораман, қамаб қўяверсинлар», – дея ҳужжатларни йиртиб ташлаганини кўриш ва эшитиш мумкин.
Ҳолат юзасидан маъмурий баённома расмийлаштириб, автомашина вақтинчалик жарима майдончасига қўйилган.
Кейинги лавҳада Matiz’нинг уй устунига келиб урилган ҳолати акс этган. Ҳайдовчи инспекторнинг тўхташ ҳақидаги ишорасига бўйсунмаган ва ҳаракатланишда давом этган. ЙПХ ходимлари уни қувиб етганида, машинадан тушган. Ундан ҳужжатлар сўралганида, Matiz’ни бошқарганини тан олмаган.
«Мен бу машинани ҳайдамадим, бу меники эмас. Агар ҳайдаган бўлсам, гуноҳ менда бўлса, майли жазоланг. Менда автомашина калити йўқ, мен буни ҳайдамадим. Мен шу жойда пиво ичиб ўтирган эдим», – деган у лавҳада.
Ҳайдовчининг оғзидан спиртли ичимлик ҳиди келган, шунингдек, у ўтирган жойда дастурхонда алкогол маҳсулотлари тургани видеода кўриниб турибди. Шу сабабли у тиббий кўрикка таклиф қилинган. Ҳайдовчининг спиртли ичимлик ичгани тасдиқланган. Транспорт воситаси эвакуаторда вақтинчалик жарима майдончасига олиб кетилган.
Аввал Наманганда автотранспорт ҳаракатланиши чекланган куни (26 июлда) рўй берган Cobalt ва тез ёрдам машинаси тўқнашуви оқибатида Damas ичидаги фуқаро ҳалок бўлгани ҳақида хабар берилган.
Изоҳ (0)