Ҳомиладор аёлларда қандай ҳолатларда коронавирус енгил ўтиши маълум қилинди

Ўзбекистонда шу пайтга қадар 234 нафар ҳомиладор аёлда коронавирус инфекцияси аниқланган, улардан 7 нафари касаллик оқибатида вафот этган. Соғлиқни сақлаш вазирлиги бошқармаси бошлиғи Барно Абдусамадова қандай ҳолатларда коронавирус ҳомиладор аёлларда оғир кечмаслигини маълум қилди.

Унинг сўзларига кўра, ҳомиладор аёллар ўзини парвариш қилса, гигиена қоидаларига риоя қилса ва белгиланган тартибларга эътибор берса, уларга касаллик юқмайди.

Шунингдек, ҳомиладор аёлларнинг ҳозирги пайтда иложи борича уйдан чиқмаслиги тавсия этилади. Физиологик жараёнлар кечаётган ҳомиладор аёлларга шифокорлар томонидан кўчага чиқиш, одам кўп тўпланадиган жойларга бориш ман қилинади.

Вазирлик вакилининг айтишича, касаллик оқибатида вафот этган ҳомиладор аёлларда ҳамроҳ касалликлар кузатилган. Бу касалликлар қаторидан семизлик, юрак қон-томир етишмовчилиги, нафар тизими касалликлари, буйрак касалликлари ўрин олган.

Тажриба ва ЖССТ тадқиқотларининг кўрсатишича, фақат коронавируснинг ўзи билан касалланган, яъни ҳамроҳ касаллиги бўлмаган ҳомиладорларда ўлим ҳолати қайд этилмаган.

Эслатиб ўтамиз, Соғлиқни сақлаш вазирлиги Тошкент шаҳрида 28 июль куни коронавирусга чалинган 40 ёшли ва 34 ёшли икки ҳомиладор аёлнинг, 27 июль куни 35 ёшли ва 32 ёшли ҳомиладор аёлларнинг вафоти ҳақида хабар берганди. 26 июль куни коронавирусга чалинган 34 ёшли яна бир тошкентлик ҳомиладор аёл вафот этган. 24 июль куни Қашқадарёда 35 ёшли ҳомиладор аёл коронавирус қурбони бўлгани ҳақида хабар берилган.

Вазирлик касаллик оқибатида вафот этган яна бир аёл ҳақида хабар бермаган. Расман тасдиқланмаган маълумотларга кўра, вафот этгани ҳақида 9 июль куни хабар берилган 28 ёшли жиззахлик аёл ҳам ҳомиладор бўлган.