Тошкент шаҳри Чилонзор туманида коронавирусга чалинган оиланинг оғир аҳволдаги аъзолари шифохонага жойлаша олмагач, ИИББга мурожаат қилиб, муаммога ечим топди. Бу ҳақда Тошкент шаҳар ИИББ ахборот хизмати хабар берди.
Маълум қилинишича, 23 июль куни ишонч телефони орқали Тошкент шаҳар ИИББ бошлиғига Чилонзор тумани оилавий поликлиникаларидан бирида ишловчи шифокор мурожаат қилиб, коронавирусга чалинган оилани шифохонага жойлаштиришда ёрдам сўраган.
Шифокорнинг маълум қилишича, унинг патронажида бўлган «1-Чарх Камолон» маҳалласида яшовчи оиланинг барча аъзолари коронавирус инфекцияси билан касалланган бўлиб, уй карантинида даволанаётган бўлган.
Амбулатор даволаниш натижа бермаган ва 1 ҳамда 3 ёшли икки нафар бола оғир аҳволда бўлишига қарамасдан, уларни шифохонага жойлаштиришнинг иложи бўлмаган. Уларнинг саломатлигидан хавотирда бўлган шифокор аёл ИИББдан ёрдам сўрашга мажбур бўлган.
«Шу куннинг ўзида мазкур мурожаат бўйича Чилонзор тумани ИИО ФМБ раҳбарияти оилавий поликлиникада бўлиб, ҳолатни ўрганишди ва туман тиббиёт бирлашмаси билан боғланишди. Тез орада тез тиббий ёрдам автомобили уч нафар вояга етмаган бола ва уларнинг онасини стационар даволаниш учун Республика ихтисослаштирилган педиатрия илмий-амалий тиббиёт марказига етказди», — дейилади хабарда.
Аввалроқ Тошкентда COVID-19’га мослаштирилган шифохоналарга коронавирусга чалинган беморларни ётқизиш тўхтатилгани тўғрисида хабар берилганди.
Эслатиб ўтамиз, Коронавирусга қарши курашиш штаби аъзоси, профессор Ҳабибулло Оқилов койка-ўринлар етмаётгани сабаб бошқа профилдаги клиникаларга беморларни ётқизишга мажбур бўлинаётганини, Президент Шавкат Мирзиёев 20 июль куни Тошкент шаҳри ва пойтахт вилоятида пандемия билан боғлиқ ҳолат ҳамда уни барқарорлаштириш бўйича чора-тадбирлар доирасидаги видеоселектор йиғилишида деярли барча ихтисослаштирилган тиббиёт муассасалари тўлдириб ташланганини айтган эди.
Шундан сўнг, «Ўзэкспомарказ»да коронавирусга чалинганлар учун 500 кишилик Тақсимлаш марказини ташкил этиш бўйича ишлар бошлаб юборилган эди. Ҳозирда у ерга 300 бемор ётқизилган. Шунингдек, Шайхонтоҳур туманидаги «Ёшлик» спорт мажмуаси коронавирус ташхиси қўйилган беморларни даволаш учун махсус марказга айлантирилиши хабар қилинган эди.
Бундан ташқари, Сергели туманидаги болалар ва ўсмирлар спорт мактаби ҳудудида коронавирусга гумон қилинганларга ташхис қўйиш, заруратга кўра даволаш учун шароит яратилган. Шу билан бирга, Тошкентда коронавирусга гумон қилинганлар ва касалланганларга ёрдам кўрсатадиган ва тун-у кун ишлайдиган 10 та махсус клиника ташкил қилинди.
Изоҳ (0)