Toshkent shahri Chilonzor tumanida koronavirusga chalingan oilaning og‘ir ahvoldagi a’zolari shifoxonaga joylasha olmagach, IIBBga murojaat qilib, muammoga yechim topdi. Bu haqda Toshkent shahar IIBB axborot xizmati xabar berdi.
Ma’lum qilinishicha, 23-iyul kuni ishonch telefoni orqali Toshkent shahar IIBB boshlig‘iga Chilonzor tumani oilaviy poliklinikalaridan birida ishlovchi shifokor murojaat qilib, koronavirusga chalingan oilani shifoxonaga joylashtirishda yordam so‘ragan.
Shifokorning ma’lum qilishicha, uning patronajida bo‘lgan “1-Charx Kamolon” mahallasida yashovchi oilaning barcha a’zolari koronavirus infeksiyasi bilan kasallangan bo‘lib, uy karantinida davolanayotgan bo‘lgan.
Ambulator davolanish natija bermagan va 1 hamda 3 yoshli ikki nafar bola og‘ir ahvolda bo‘lishiga qaramasdan, ularni shifoxonaga joylashtirishning iloji bo‘lmagan. Ularning salomatligidan xavotirda bo‘lgan shifokor ayol IIBBdan yordam so‘rashga majbur bo‘lgan.
“Shu kunning o‘zida mazkur murojaat bo‘yicha Chilonzor tumani IIO FMB rahbariyati oilaviy poliklinikada bo‘lib, holatni o‘rganishdi va tuman tibbiyot birlashmasi bilan bog‘lanishdi. Tez orada tez tibbiy yordam avtomobili uch nafar voyaga yetmagan bola va ularning onasini statsionar davolanish uchun Respublika ixtisoslashtirilgan pediatriya ilmiy-amaliy tibbiyot markaziga yetkazdi”, — deyiladi xabarda.
Avvalroq Toshkentda COVID-19’ga moslashtirilgan shifoxonalarga koronavirusga chalingan bemorlarni yotqizish to‘xtatilgani to‘g‘risida xabar berilgandi.
Eslatib o‘tamiz, Koronavirusga qarshi kurashish shtabi a’zosi, professor Habibullo Oqilov koyka-o‘rinlar yetmayotgani sabab boshqa profildagi klinikalarga bemorlarni yotqizishga majbur bo‘linayotganini, Prezident Shavkat Mirziyoyev 20-iyul kuni Toshkent shahri va poytaxt viloyatida pandemiya bilan bog‘liq holat hamda uni barqarorlashtirish bo‘yicha chora-tadbirlar doirasidagi videoselektor yig‘ilishida deyarli barcha ixtisoslashtirilgan tibbiyot muassasalari to‘ldirib tashlanganini aytgan edi.
Shundan so‘ng, “O‘zekspomarkaz”da koronavirusga chalinganlar uchun 500 kishilik Taqsimlash markazini tashkil etish bo‘yicha ishlar boshlab yuborilgan edi. Hozirda u yerga 300 bemor yotqizilgan. Shuningdek, Shayxontohur tumanidagi “Yoshlik” sport majmuasi koronavirus tashxisi qo‘yilgan bemorlarni davolash uchun maxsus markazga aylantirilishi xabar qilingan edi.
Bundan tashqari, Sergeli tumanidagi bolalar va o‘smirlar sport maktabi hududida koronavirusga gumon qilinganlarga tashxis qo‘yish, zaruratga ko‘ra davolash uchun sharoit yaratilgan. Shu bilan birga, Toshkentda koronavirusga gumon qilinganlar va kasallanganlarga yordam ko‘rsatadigan va tun-u kun ishlaydigan 10 ta maxsus klinika tashkil qilindi.
Izoh (0)