«Бунёдкор» ярим ҳимоячиси Жасур Жалолиддинов фаолиятини Москванинг «Локомотив» жамоасида давом эттиради. Бу ҳақда «темир йўлчилар» расмий сайтида маълум қилинди.
18 ёшли ўзбекистонлик футболчи москваликлар клуби билан беш йиллик шартнома имзолади. У янги жамоасида 23-рақам остида ҳаракат қилади.
«Албатта, мен «Локомотив» ҳақида кўп нарсани биламан. Бу ерга ўтишдан аввал чемпионликка бағишланган фильмни томоша қилдим, клуб тарихини ўргандим, жамоада кимлар ўйнашини биламан.
Алексей Миранчук билан танишишни хоҳлайман, у билан услубларимиз бир хил ва у ҳам чапақай. Озгина ҳаяжон бор, бироқ бу яхши, чунки масъулиятни ҳис қиляпман. Ўйин бошлангандан кейин ҳаяжон йўқолади», — дейди Жалолиддинов.
Аввалроқ «Локомотив» Жасур трансфери учун 1 миллион евродан ортиқ маблағ сарфлаши ва бу миқдорнинг 100 минг евроси «Бунёдкор»га тегиши ҳақида хабар қилинганди.
Жалолиддинов жорий мавсум Ўзбекистон чемпионатида 8 ўйин ўтказиб, биттадан гол ва голли узатмага муаллифлик қилди.
Жасур Жалолиддинов ижросидаги энг сара голлар ва дриблинглар тўплами (видео)
Жасур Жалолиддинов — 2002 йил 15 майда Навоийда туғилган. 2018 йил 2 август санасида «Бунёдкор» сафида Суперлига доирасида дебют ўйинини «Қўқон-1912»га қарши ўтказган. У дебют қилган вақтда 16 ёш 80 кунлик эди. Бу орқали у Ўзбекистон чемпионатида майдонга тушган энг ёш футболчига айланганди. 2019 йил октябрида The Guardian талқинига кўра, дунёнинг энг истеъдодли 60 футболчиси рўйхатида қайд этилган. 2019 йил якунларига кўра, Суперлиганинг энг яхши ўйинчиси деб топилган. 2019 йил декабрида Италиянинг «Беневенто» клуби кўригида бўлган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)