Майамида истиқомат қилувчи Дэвид Т.Хайнс исмли тадбиркор давлат томонидан коронавирус эпидемияси шароитида тадбиркорларга кўрсатилаётган ёрдам дастури доирасида ажратилган пуллар эвазига 2020 йилда ишлаб чиқарилган Lamborghini Huracan спорткарини сотиб олди. Эндиликда у 30 йилга қамалиши ва катта миқдорда жаримага тортилиши мумкин, деб ёзади NBC News.
Бизнесмен банкдан давлат ёрдами сифатида 13,5 миллион доллар сўраган. Банк унга 3,9 миллион доллар ажратишга розилик берган.
Хайнс ушбу маблағларни ўз ишчиларига маош сифатида сарфлаганида олинган қарзни қайтармаслиги ҳам мумкин эди. Бироқ тадбиркор 318 минг доллар эвазига ҳашаматли спорткар харид қилишни маъқул кўрган.
Федерал прокуратура уни банк фирибгарлигида айбламоқда. Аниқланишича, Хайнс банкка тақдим этган ҳужжатлар қалбаки бўлган. Унинг кўплаб ходимлари фақат қоғозда мавжуд. Шунингдек, давлат томонидан ажратилган пулларни у дўконлар ва Майамидаги курортларда сарфлаб юборган.
Америкалик эркакнинг автомобили ва ҳисобидаги барча маблағлар мусодара қилинган. У 30 йилгача озодликдан маҳрум этилиши ва бир миллион долларга яқин жарима тўлаши мумкин.
Аввалроқ АҚШ ҳукумати мамлакат иқтисодиётини қўллаб-қувватлашга яна 1 триллион доллар ажратишни таклиф қилган эди.
Изоҳ (0)