Япониянинг Такаока шаҳридаги Toyota заводи бешинчи авлод RAV4 шакли устида тажриба ўтказишга қарор қилди. Кроссоверлар йиғиш билан шуғулланувчи корхона ходимлари RAV4’ни лимузинга айлантирди, деб хабар беради Motor.
Лимузин ёш ходимлар малакасини оширишга қаратилган таълим дастури доирасида яратилган. Южи Озава бошчилигидаги лойиҳа устида 200 га яқин завод ходимлари ва муҳандислари иш олиб борган. Эксклюзив RAV4’ни яратиш учун салкам тўрт ой вақт кетган, чунки модель билан ишчилар бўш вақтларида шуғулланган.
Бошқарув қисми чап тарафда жойлашган RAV4’нинг ғилдираклар базаси узайтирилган ва унинг ўртасига 800 миллиметрли махсус «вставка» қўйилган — эндиликда кроссовернинг узунлиги 5400 миллиметрни ташкил этмоқда. Узайтирилган кузов қўшимча мустаҳкамланган. Автомобиль оғирлиги эса 100 килограммга ортган.
Салон конфигурацияга ўзгартириш киритилмаган — қўшимча кенг макон орқа йўловчилар учун қулайлик туғдиради. Пол қисмига бинафша ранг гилам тўшалган, олд панел эса кузов рангида бўялган.
Бугунги кунда Toyota’нинг Такаокедаги заводида RAV4’дан ташқари Corolla ва Harrier моделлари ҳам ишлаб чиқарилади. Озаванинг сўзларига кўра, ушбу лимузинни яратишдан мақсад — лойиҳа давомида ходимларнинг ижодий фикрлаш қобилиятини текшириш, шунингдек, янги нарса яратишда жамоа бўлиб ишлай олиш кайфиятини шакллантириш бўлган.
Аввалроқ Японияда Toyota Harrier’ни харид қилмоқчи бўлганлар навбати 1,5 йилга чўзилиб кетгани тўғрисида хабар берилганди.
Изоҳ (0)