Ўзбекистонда Volkswagen Caddy моделининг савдоси 27 июлдан бошланади, деб хабар беради Spot.
Маълумотларга кўра, 27 июль куни эрталаб автомобилнинг онлайн-тақдимоти бўлиб ўтади. Шу куннинг иккинчи ярмидан бошлаб автосалонга келиб машинани томоша қилиш ёки харид қилиш мумкин бўлади.
Автомобильлар Тошкентнинг Сергели туманидаги Volkswagen автосалонида сотилади (Обиҳаёт кўчаси, 39).
Эслатиб ўтамиз, 2020 йилнинг март ойида «Ўзавтосаноат» АЖ ва «Folksvagen Grup Rus» компанияси енгил тижорат автомобилларини ишлаб чиқариш тўғрисида келишув имзолаган эди. Унга кўра, «Жиззах автомобиль заводи» МЧЖ компанияси базасида енгил тижорий автомобиллар ишлаб чиқариш бошланган. Июнь ойида эса ишлаб чиқариш жараёнларини тезлаштириш учун Ўзбекистонга Volkswagen Caddy партияси олиб келинган эди.
«Ўзавтосаноат» маълумотларига кўра, 2020 йилда моделнинг тўртинчи авлодини, 2021 йилдан эса бешинчи авлодининг тўлиқ циклини ишлаб чиқаришни йўлга қўйишни режалаштирмоқда.
Volkswagen Caddy 2015 йилда тақдим этилган бўлиб, нафақат йўловчилар ёки юк ташиш учун, балки оилавий узоқларга сафарга чиқиш учун мўлжалланган.
Volkswagen Caddy Ўзбекистонда қанча нархда сотувга чиқиши ҳозирча номаълум. Масалан, Россияда унинг нархи жамланмаларига қараб 18—33 минг доллар атрофида.
Изоҳ (0)