Yaponiyaning Takaoka shahridagi Toyota zavodi beshinchi avlod RAV4 shakli ustida tajriba o‘tkazishga qaror qildi. Krossoverlar yig‘ish bilan shug‘ullanuvchi korxona xodimlari RAV4’ni limuzinga aylantirdi, deb xabar beradi Motor.
Limuzin yosh xodimlar malakasini oshirishga qaratilgan ta’lim dasturi doirasida yaratilgan. Yuji Ozava boshchiligidagi loyiha ustida 200 ga yaqin zavod xodimlari va muhandislari ish olib borgan. Eksklyuziv RAV4’ni yaratish uchun salkam to‘rt oy vaqt ketgan, chunki model bilan ishchilar bo‘sh vaqtlarida shug‘ullangan.
Boshqaruv qismi chap tarafda joylashgan RAV4’ning g‘ildiraklar bazasi uzaytirilgan va uning o‘rtasiga 800 millimetrli maxsus “vstavka” qo‘yilgan — endilikda krossoverning uzunligi 5400 millimetrni tashkil etmoqda. Uzaytirilgan kuzov qo‘shimcha mustahkamlangan. Avtomobil og‘irligi esa 100 kilogrammga ortgan.
Salon konfiguratsiyaga o‘zgartirish kiritilmagan — qo‘shimcha keng makon orqa yo‘lovchilar uchun qulaylik tug‘diradi. Pol qismiga binafsharang gilam to‘shalgan, old panel esa kuzov rangida bo‘yalgan.
Bugungi kunda Toyota’ning Takaokedagi zavodida RAV4’dan tashqari Corolla va Harrier modellari ham ishlab chiqariladi. Ozavaning so‘zlariga ko‘ra, ushbu limuzinni yaratishdan maqsad — loyiha davomida xodimlarning ijodiy fikrlash qobiliyatini tekshirish, shuningdek, yangi narsa yaratishda jamoa bo‘lib ishlay olish kayfiyatini shakllantirish bo‘lgan.
Avvalroq Yaponiyada Toyota Harrier’ni xarid qilmoqchi bo‘lganlar navbati 1,5 yilga cho‘zilib ketgani to‘g‘risida xabar berilgandi.
Izoh (0)