Техасда 2012 йилда ишлаб чиқарилган ва ҳозирга қадар 165 километр йўл босган ноёб қизил Ferrari SP30 яна сотувга қўйилди. Ягона нусхада яратилган спорткарга 2018 йилдан буён харидор чиқмаяпти, деб хабар беради Motor.
Ferrari SP30 2012 йилда дубайлик бизнесмен Чирага Аря буюртмасига асосан яратилган. Машина асосини Ferrari 599 GTО ташкил этади, бироқ ноёб модель ташқи кўриниши билан Ф12 Берлинетта ёки 812 Суперфаст модификацияларини ёдга солади. 2018 йилда ягона нусхадаги машинанинг эгаси спорткарни сотувга қўйган.
Шундан кейин Ferrari SP30 АҚШдаги аукционга қўйилган бўлиб, автомобиль бир неча ой омборда қолган. Кейинроқ моделни Францияда сотишга қарор қилишган, бироқ у ерда ҳам харидор топилмаган. Шу сабабли спорткар яна АҚШга «қайтиб келган», ҳозирда у Техасдаги аукционга қўйилган.
Ferrari SP30 670 от кучига эга 6,0 литрли V12 бензин двигатели ёрдамида ҳаракатга келади. Агрегат олти поғонали автомат узатмалар қутиси ёрдамида бошқарилади. Спорткар соатига 100 километр тезликка чиқиши учун 3,3 сония кифоя, максимал тезлиги эса 335 км/соатни ташкил этади.
Ҳозиргача 165 километр йўл босган моделнинг нархи маълум қилинмаган, уни шахсий сўров юбориб билиб олиш мумкин.
Изоҳ (0)