Ички ишлар вазирлигининг Йўл ҳаракати хавфсизлиги бош бошқармаси Тошкент шаҳрининг Юнусобод туманида содир бўлган йўл-транспорт ҳодисаси ва ёниб кетган Lacetti ҳақида маълумот берди.
Хабарга кўра 24 июль куни соат 18:50 ларда Тошкент шаҳри Яшнобод туманида яшовчи 1996 йилда туғилган С.М. бошқарувидаги Lacetti Абдулла Қодирий кўчасидан Амир Темур кўчасигача бўлган масофада тезликни меъёридан оширган ҳолда ҳаракатланган. Ҳайдовчи эҳтиётсизлиги оқибатида рул бошқарувини йўқотиб, йўлни ажратувчи бўлагидан қарама-қарши йўналишга ўтиб кетган. Машина дарахтга урилган ва транспорт воситасида ёнғин юзага келган.
ЙТҲ оқибатида ҳайдовчи тан жароҳати олиб шифохонага олиб кетилган. Ёнғин ўт ўчирувчилар томонидан бартараф қилинган.
Ҳолат юзасидан Тошкент шаҳар ИИББ ЙҲХБ масъул ходимлари томонидан суриштирув ишлари олиб борилмоқда, дейилади бошқарма хабарида.
Аввалроқ Telegram каналларда Тошкент шаҳрида ёнаётган Lacetti тасвирланган видеолар тарқалганди.
Аввал Тошкент шаҳрида «ВАЗ-2107» («Жигули») автомобили ёниб кетгани, Мирзо Улуғбек туманида Mercedes-Benz билан тўқнашган Nexia-3’да ёнғин содир бўлгани, Сергели туманида «Оқава сув таъминоти» МЧЖга қарашли Тиcо русумли транспорт воситасида ёнғин юзага келгани ҳақида хабарлар берилган.
Изоҳ (0)