Президент 23 июнь куни «Ўзбекистон Республикаси Алкогол ва тамаки бозорини тартибга солиш ҳамда виночиликни ривожлантириш агентлиги фаолиятини ташкил этиш тўғрисида»ги қарорни имзолади.
Адлия вазирлиги матбуот хизматининг хабар беришича, қарор билан Алкогол ва тамаки бозорини тартибга солиш ҳамда виночиликни ривожлантириш агентлигининг ташкилий тузилмаси тасдиқланди.
Унга кўра, агентлик директори бош вазир томонидан лавозимга тайинланади ва лавозимдан озод этилади. Агентлик директори мақоми, меҳнатга ҳақ тўлаш, тиббий ва транспорт хизмати кўрсатиш шароитлари бўйича вазир ўринбосарига тенглаштирилади.
Қарорга мувофиқ, истеъмол ва техник этил спирти, алкогол ва тамаки маҳсулотлари ишлаб чиқариш фаолиятига лицензия бериш, лицензиянинг амал қилишини тўхтатиб туриш ёки тугатиш, шунингдек, уни бекор қилиш ва қайта расмийлаштириш тўғрисидаги қарорлар Вазирлар Маҳкамасининг тегишли комиссияси томонидан қабул қилинади.
Аввалроқ алкогол ва тамаки маҳсулотларига янги намунадаги акциз маркалари жорий этилгани хабар берилган эди. Эски намунадаги акциз маркалари билан маркаланган улгуржи ва чакана савдо тармоғидаги алкогол ва тамаки маҳсулотлари 2021 йил 1 февралдан маркаланмаган деб ҳисобланади ва белгиланган тартибда олиб қўйилади.
Изоҳ (0)