Наманган вилоятида содир бўлган йўл-транспорт ҳодисаси оқибатида жабрланган шахсга айбланувчидан 75 миллион сўм ундирилиб берилди, дея «Дарё»га хабар беради Мажбурий ижро бюроси.
Қайд этилишича, Қўштепа тумани Сармозор қишлоғида яшовчи М. Фозилов Наманган вилояти Поп туманида йўл-транспорт ҳодисаси содир этганлиги сабабли суд томонидан Ўзбекистон Республикаси Жиноят кодексининг 266-моддаси 1-қисми (Баданга ўртача оғир ёки оғир шикаст етказилишига сабаб бўладиган транспорт воситалари ҳаракати ёки улардан фойдаланиш хавфсизлиги қоидаларини бузиш) билан айбли деб топилган ва жинояти оқибатида жабрланувчи А. Аҳмаджоновга етказилган 75 миллион 362 минг сўм моддий зарар ундирилиши белгиланган.
Бу ҳақдаги жиноят ишлари бўйича Поп туман судининг 2020 йил 12 март кунидаги ижро варақаси 2020 йил 5 апрель кунида Мажбурий ижро бюроси Қўштепа туман бўлимига келиб тушган ва ижро иши юритуви қўзғатилди.
Давлат ижрочиси томонидан қарздор М. Фозиловга қонунда белгиланган ихтиёрий муддат белгилаб берилган, бироқ суд ҳужжатида кўрсатилган моддий зарар тўлаб берилмагандан кейин мажбурий ижро ҳаракатларини амалга оширишга киришилди.
Қарздорнинг банк ҳисоб рақамлари, омонат пул маблағлари, номига кўчмас мулклар расмийлаштирилганлиги ва транспорт воситаси қайд этилганлиги текширилди ҳамда унинг яшаш манзилида кўздан кечирилди. Бироқ суд ҳужжатида кўрсатилган моддий зарарни ундириш учун ҳеч нарса аниқланмаган.
Шундан сўнг қарздор М. Фозилов ва унинг ота-онаси иштирокида яшаш манзилидаги маҳалла фуқаролар йиғинида тушунтириш ишлари олиб борилгач, 2020 йил 21 июль куни қарздор М. Фозилов ва унинг отаси Р. Фозилов томонидан 75 миллион сўм нақд пул олиб келиниб, ундирувчига шахсан топширилди.
Ижро ҳужжати ижроси тўлиқ таъминланганлиги сабабли тугатилиб, тегишли судга қабул қилинган қарор нусхаси юборилди.