«Сурхон» футбол клуби 13 нафар футболчисининг коронавирус инфекцияси учун топширган тест натижалари мусбат кўрсаткич қайд этди. Бу ҳақда Профессионал футбол лигаси хабар бермоқда .
Таъкидланишича, ҳозирда касалликка чалинган футболчилар жамоадан ажратилиб, ўз-ўзини яккалаш ҳолатига олинган. Шунингдек, жамоа массажчилари ҳам вирус юқтириб олган.
Шу боис клубнинг бошқа футболчи ва ходимлари COVID-19’га яна бир бор тест топширгани ва айни дамда улар тест жавобларини кутаётгани айтилмоқда.
Эслатиб ўтамиз, аввалроқ мазкур жамоанинг икки нафар ўйинчисида коронавирус инфекцияси аниқлагани ҳақида хабар берилганди.
Бироз вақт муқаддам ПФЛ «Насаф», «Сўғдиёна» ва «Қўқон-1912» жамоаларида бирорта ҳам коронавирус билан боғлиқ бўлган ҳолат кузатилмаганини маълум қилганди.
Қайд этиш жоиз, ҳозирга қадар «Бухоро»нинг саккиз нафар, «Пахтакор»нинг беш нафар, «Бунёдкор»нинг бир нафар ўйинчиси коронавирусга чалингани тўғрисида хабар берилганди. Шунингдек, Про-Лигада қатнашадиган Самарқанднинг «Динамо» клубининг уч нафар футболчисида коронавирус инфекцияси борлиги гумон қилиниб, 15 июль куни «Хоразм»га қарши ўтказилиши керак бўлган беллашув ҳам бекор қилинганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)