Элдор Шомуродов «Ростов» билан Европа Лигаси йўлланмасига эга чиқди

Футбол бўйича Россия Премьер Лигасининг сўнгги, 30-турида турида ўзбекистонлик ҳужумчи Элдор Шомуродов тўп тепаётган«Ростов» мусобақа чемпиони «Зенит»га мағлуб бўлди (1:2).

Мавсум якунларига кўра, «Ростов» 5-ўринни эгаллаб, Европа Лигаси саралаши босқичида иштирок этиш ҳуқуқини қўлга киритди. Валерий Карпин шогирдларининг қайси босқичдан баҳсларга кириши Россия Кубоги финали натижасига боғлиқ.

Агар «Химки» клуби финалда «Зенит»ни мағлуб этса, «Ростов» иккинчи саралаш раундидан бошлайди. Агарда «Зенит» ғалаба қозонса, у ҳолда Шомуродов жамоаси учинчи саралаш босқичидан баҳсларга киради.

Эслатиб ўтамиз, аввалроқ «Ростов» Ўзбекистон терма жамоаси ҳужумчисини сотишга қарор қилгани ҳақида хабар берилганди. Қайд этиш жоиз, бир муддат аввал эса Шомуродов учун Бельгиянинг «Гент» клуби 5 миллион евро таклиф қилганди.

Маълумот учун, Элдор Шомуродов Россия чемпионати 2019/20 йилги мавсумида 28 ўйин ўтказиб, 11 гол ва 7 та голли узатма муаллифига айланди.

Элдор Шомуродовнинг «Ростов» ва Ўзбекистон терма жамоаси сафида урган барча голларини томоша қилинг (видео)