Олмалиқда ПЗР таҳлилини амалга оширувчи вирусология лабораторияси очилади

Олмалиқ шаҳар Санитария-эпидемиология осойишталик маркази қошида замонавий стационар вирусология лабораторияси барпо этилмоқда. Қурилиш ишлари «Олмалиқ кон-металлургия комбинати» раҳбарияти ташаббуси билан комбинат тасарруфидаги «Олмалиқметаллургқурилиш» трести томонидан амалга оширилмоқда. Бу ҳақда комбинат ахборот хизмати хабар берди.

Трест бош муҳандиси Акмал Абдуқодировнинг маълум қилишича, комбинат раҳбарияти топшириғи асосида 2020 йил 15 июль куни қурилиш ишлари бошлаб юборилган. Қурилиш ишлари 3 сменада ташкил этилган бўлиб, асосан, трест ишчи-ходимлари томонидан олиб борилмоқда.

Лаборатория лойиҳаси Санитария–эпидемиологик осойишталик агентлиги билан келишилган ҳолда комбинатнинг Лойиҳа ишлари бошқармаси томонидан тайёрланган.

Маълум қилинишича, лаборатория биносида 12 та хона мавжуд бўлиб, айни кунларда таъмир ишларининг деярли 90 фоизи бажарилган. Бино вентиляцион тизими комбинат Ихтисослаштирилган таъмир ишлари бошқармаси томонидан буткул янгиланган. Канализация, иссиқ ва совуқ сув тизимлари, электр қисмлари ишлари, ободонлаштириш ишлари якунига етказилган. Том қисмига замонавий қоплама ётқизилган. Айни пайтда бинода плиткаларни ўрнатиш ва ташқи фасад ишлари амалга оширилмоқда. Комбинат томонидан лаборатория жиҳозланиб, ПЗР аппарати ҳам олиб берилади.

Таъкидланишича, стационар вирусология лабораториясини ушбу ҳафтада фойдаланишга топшириш режалаштирилмоқда.

Лаборатория ишга тушиши билан олмалиқликлар коронавирус инфекцияси бўйича топширилган таҳлил намуналари хулосасини 24 соатда олиш имконига эга бўлади.

Эслатиб ўтамиз, Олмалиқда бир неча кун олдин вафот этган икки аёлда ўлимидан сўнг коронавирус тасдиқлангани маълум бўлди, бироқ Соғлиқни сақлаш вазирлиги мазкур ўлим ҳолатлари ҳақида ҳозирча расмий маълумот бермаган. Шунингдек, Олмалиқ шаҳридаги тиббиёт ходимида коронавирус аниқлангани ҳақида хабар берилганди.