2020 йилнинг январь—июнь ойлари якуни бўйича Ўзбекистон ташқи савдо айланмаси (ТСА) 15,855 миллиард долларни ташкил этиб, 2019 йилнинг шу даврига нисбатан 3,528 миллиард долларга (18,2 фоиз) камайди. Бу ҳақда Давлат статистика қўмитаси маълумотларида келтирилган.
Ташқи савдо айланмасида экспорт ҳажми 6,285 миллиард долларга (22,6 фоизга камайган) ва импорт ҳажми 9,57 миллиард долларга (15 фоизга камайган) етган. Ҳисобот даврида 3,285 миллиард доллар қийматида пассив ташқи савдо баланси қайд этилган.
Экспорт ҳажми динамикасидан кўриш мумкинки, биринчи чоракда у 3,3 миллиард долларни ташкил этган бўлса, иккинчисида 2,9 миллиард долларга етган (13,8 фоизга, яъни 464 миллиард долларга камайган). Импорт ҳажми январь март ойларида 4,7 миллиард долларни, апрель—июнь ойларида эса бироз ошиб, 4,8 миллиард долларга етган.
Қайд этилишича, Ўзбекистон жаҳоннинг 150 дан ортиқ мамлакати билан савдо алоқаларини амалга ошириб келмоқда. Ташқи савдо айланмасининг нисбатан салмоқли ҳиссаси Хитой (18,1 фоиз ёки 2,8 миллиард доллар), Россия (16,3 фоиз ёки 2,5 миллиард доллар), Қозоғистон (8,4 фоиз ёки 1,3 миллиард доллар), Жанубий Корея (7,1 фоиз ёки 1,1 миллиард доллар), Туркия (5,6 фоиз ёки 886,6 миллион доллар), Қирғизистон (2,5 фоиз ёки 395,2 миллион доллар) ва Германия (2,1 фоиз ёки 337 миллион доллар) давлатларининг улушларига тўғри келмоқда.
Ўзбекистон экспорти таркибида асосий улушни олтин (33,8 фоиз), саноат маҳсулотлари (18,7 фоиз), озиқ-овқат ва тирик ҳайвонлар (8,9 фоиз), кимёвий воситалар (6,1 фоиз), минерал ёқилғи (5,1 фоиз) ва бошқа маҳсулотлар ташкил этади.
Импорт соҳасида асосий улуш машина ва транспорт қурилмалари (37,1 фоиз), саноат маҳсулотлари (16,8 фоиз), шунингдек, кимёвий воситалари ва муқобил маҳсулотлар (13,7 фоиз) ҳисобига тўғри келмоқда.
Изоҳ (0)